നീരൊഴുക്ക് ശക്തം, ജലനിരപ്പ് ഉയർന്നു ; കല്ലാർകുട്ടി, പാംബ്ല ഡാമുകളിലെ എല്ലാ ഷട്ടറുകളും ഉയർത്തി ; ജാ​ഗ്രതാ നിർദേശം

പൈനാവ് : കനത്ത മഴയെത്തുടർന്ന് ജലനിരപ്പ് ഉയർന്നതോടെ ഇടുക്കി ജില്ലയിലെ കല്ലാർകുട്ടി, പാംബ്ല ഡാമുകളിലെ എല്ലാ ഷട്ടറുകളും ഉയർത്തിയതായി ജില്ലാ ഭരണകൂടം അറിയിച്ചു. കല്ലാർകുട്ടിയിൽ നിന്നും 1500 ക്യുമെക്സ് വരെയും പാംബ്ല ഡാമിൽ നിന്നും 3000 ക്യുമെക്സ് വരെയും ജലം ഉടൻ തന്നെ പുറത്തുവിടുന്നതാണ്‌. പെരിയാർ, മുതിരപ്പുഴയാർ നദികളുടെ ഇരുകരകളിലുമുള്ളവർ ജാഗ്രത പാലിക്കേണ്ടതാണ് എന്നും ജില്ലാകളക്ടർ അറിയിച്ചു. 

ഇടുക്കിയിലെ മലയോരമേഖലകളിൽ കനത്ത മഴ തുടരുകയാണ്. ഇതേത്തുടർന്ന് അണക്കെട്ടുകളിലേക്കുള്ള നീരൊഴുക്കും വർധിച്ചിട്ടുണ്ട്. ഈ സാഹചര്യത്തിലാണ് വെള്ളം ഒഴുക്കികളയുന്നത്. നദികളിൽ ജലനിരപ്പ് ക്രമാതീതമായി ഉയരാൻ സാധ്യതയുള്ളതിനാൽ തീരങ്ങളിൽ താമസിക്കുന്നവർ ജാ​ഗരൂകരായിരിക്കണമെന്ന് നിര്ഡദേശിച്ചിട്ടുണ്ട്. 

മുല്ലപ്പെരിയാര്‍, ഇടുക്കി അണക്കെട്ടുകളിലേക്ക് നീരൊഴുക്ക് ശക്തമാണ്. മുല്ലപ്പെരിയാറില്‍ കഴിഞ്ഞ  നാലുദിവസത്തിനിടെ 12 അടി വെള്ളം ഉയര്‍ന്നു. ഇപ്പോള്‍ ജലനിരപ്പ് 130 അടിയാണ്. ഇടുക്കി അണക്കെട്ടിലും കഴിഞ്ഞ നാലു ദിവസത്തിനിടെ 12 അടി വെള്ളം ഉയര്‍ന്ന് 2353 അടി പിന്നിട്ടു.