നൗഷാദിന് പിന്നാലെ ആന്റോയും; പ്രളയബാധിതര്‍ക്ക് നല്‍കിയത് കെട്ടുകണക്കിന് വസ്ത്രങ്ങള്‍, നന്‍മ മരിച്ചിട്ടെല്ലെന്ന് മലയാളി 

ദുരിതാശ്വാസ ക്യാംപുകളിലേക്ക് ചാക്കുകെട്ട് കണക്കിന് വസ്ത്രങ്ങള്‍ നല്‍കിയ എറണാകുളത്തെ വ്യാപാരി നൗഷാദിന് നന്ദി പ്രകടിപ്പിച്ച് മുഖ്യമന്ത്രിയുള്‍പ്പെടെ രംഗത്തെത്തിയിരുന്നു. അദ്ദേഹം നമ്മള്‍ക്കെല്ലാവര്‍ക്കും മാതൃകയാണ്, ഇതുപോലെ അനേകം സുമനസുകള്‍ ഈ നാടിന് കാവലായുണ്ട് എന്നായിരുന്നു മുഖ്യമന്ത്രി പറഞ്ഞത്. 

ഇതിന് പിന്നാലെ സമാനമായ തരത്തില്‍ സഹായഹസ്തങ്ങളുമായി ഒരാള്‍ കൂടി രംഗത്തെത്തിയിരിക്കുകയാണ്. ചാലക്കുടി മാര്‍ക്കറ്റിലെ ആന്റോ ഫാഷന്‍ വെയര്‍ ഉടമ ആന്റോയാണ് പ്രളയബാധിതര്‍ക്കായി തന്റെ കടയില്‍ നിന്ന് വസ്ത്രങ്ങള്‍ നല്‍കിയത്. ദുരിതബാധിതര്‍ക്കു വേണ്ടിയുള്ള വസ്തുക്കള്‍ ശേഖരിക്കാനെത്തിയ ഡിവൈഎഫ്‌ഐ ചാലക്കുടി ബ്ലോക്ക് കമ്മറ്റിയുടെ സംഘത്തിനാണ് ആന്റോ വസ്ത്രങ്ങള്‍ കൈമാറിയത്. 

എറണാകുളം ബ്രോഡ് വേയില്‍ പ്രളയബാധിതര്‍ക്ക് സഹായം അഭ്യര്‍ഥിച്ചുവന്നവര്‍ക്ക് കെട്ടുകണക്കിന് വസ്ത്രങ്ങള്‍ നല്‍കിയ നൗഷാദിന്റെ വീഡിയോ സാമൂഹികമാധ്യമങ്ങളില്‍ വൈറലായിരുന്നു.