പോയത് എഴുതിത്തയ്യാറാക്കിയ പ്രസംഗവുമായി, വിവാദ പരാമര്‍ശങ്ങള്‍ ഉദ്ദേശിച്ചിരുന്നില്ലെന്ന് ഗവര്‍ണര്‍ 

കണ്ണൂര്‍: കണ്ണൂര്‍ സര്‍വകലാശാലയിലെ  ചരിത്ര കോണ്‍ഗ്രസ് വേദിയില്‍ പൗരത്വ നിയമം സംബന്ധിച്ച പരാമര്‍ശങ്ങള്‍ ഉദ്ദേശിച്ചിരുന്നില്ലെന്ന് ഗവര്‍ണര്‍ ആരിഫ് മുഹമ്മദ് ഖാന്‍. തനിക്കു മുന്‍പേ സംസാരിച്ചവര്‍ ഭരണഘടന തകര്‍ന്നുവെന്ന തരത്തില്‍ സംസാരിച്ചതിനോടുള്ള പ്രതികരണമായാണ്, ഇക്കാര്യങ്ങള്‍ പറഞ്ഞത്. ഭരണഘടന തകര്‍ന്നുവെന്ന വാദത്തെ അംഗീകരിക്കാനാവില്ലെന്നും ഗവര്‍ണര്‍ പറഞ്ഞു.

ചരിത്ര കോണ്‍ഗ്രസിന്റെ ഉദ്ഘാടന ചടങ്ങ് ഔപചാരികമായി നടത്തേണ്ടതാണ്. അവിടെ തയാറാക്കിയ പ്രസംഗവുമായാണ് പോയത്. ചരിത്രത്തിന്റെ പ്രസക്തി, അത് വസ്തുനിഷ്ഠമാവേണ്ടതിന്റെ ആവശ്യകത തുടങ്ങിയവ ഒക്കെയായിരുന്നു പ്രസംഗത്തില്‍ ഉള്‍പ്പെടുത്തിയിരുന്നു. എന്നാല്‍ തനിക്കു മുമ്പേ അവിടെ സംസാരിച്ചവര്‍ രാഷ്ട്രീയ പ്രസ്താവനകള്‍ നടത്തി. ഭരണഘടന തകര്‍ന്നുവെന്നു പ്രസംഗിച്ചു. അതിനോടുള്ള പ്രതികരണമായാണ്, പൗരത്വ നിയമത്തെക്കുറിച്ചു പറഞ്ഞതെന്ന് ഗവര്‍ണര്‍ വിശദീകരിച്ചു.

അതിനിടെ ഗവര്‍ണര്‍ക്കു നേരെയുണ്ടായ പ്രതിഷേധത്തെ വിമര്‍ശിച്ച് ബിജെപി രംഗത്തെത്തി. കേന്ദ്ര സര്‍ക്കാരിന്റെ പ്രതിനിധിയായ ഗവര്‍ണര്‍ക്ക് സംരക്ഷണം കൊടുക്കാന്‍ സംസ്ഥാന സര്‍ക്കാരിന് ആവുന്നില്ലെങ്കില്‍ കേന്ദ്രം ബദല്‍ മാര്‍ഗം ആലോചിക്കുമെന്ന് ബിജെപി സംസ്ഥാന ജനറല്‍ സെക്രട്ടറി എംടി രമേശ് പറഞ്ഞു. സര്‍ക്കാര്‍ സ്‌പോര്‍ണ്‍സേഡ് പ്രതിഷേധമാണ് കണ്ണൂരില്‍ ഗവര്‍ണര്‍ക്കെതിരെ ഉണ്ടായതെന്ന് രമേശ് പറഞ്ഞു.

കേന്ദ്ര സര്‍ക്കാരിന്റെ പ്രതിനിധിയാണ് ഗവര്‍ണര്‍. രാഷ്ട്രപതിയാണ് ഗവര്‍ണറെ നിയമിക്കുന്നത്. ഭരണഘടനാപരമായ ചുമതല വഹിക്കുന്ന ഗവര്‍ണര്‍ക്കു സംരക്ഷണം കൊടുക്കാനുള്ള ബാധ്യത സംസ്ഥാനത്തിനുണ്ട്. സംസ്ഥാനം ആ ബാധ്യത നിറവേറ്റുന്നില്ലെങ്കില്‍ കേന്ദ്ര സര്‍ക്കാരിന് ബദല്‍ മാര്‍ഗം തേടേണ്ടിവരും- എംടി രമേശ് പറഞ്ഞു.

പാര്‍ലമെന്റ് പാസാക്കുകയും രാഷ്ട്രപതി ഒപ്പുവച്ച് അംഗീകരിക്കുകയും ചെയ്ത ഒരു നിയമത്തിന് എതിരായി ഗവര്‍ണര്‍ സംസാരിക്കണമെന്നാണോ പറയുന്നത്? അതെങ്ങനെ സാധ്യമാവും ? ഗവര്‍ണര്‍ക്ക് ഭരണഘടനയെക്കുറിച്ച് നല്ല ബോധ്യമുണ്ട്. അതുകൊണ്ടാണ് ഇത്തരത്തില്‍ അദ്ദേഹം നിലപാട് സ്വീകരിക്കുന്നത്. ഗവര്‍ണര്‍ക്കെതിരെ ചില മന്ത്രിമാരും സ്പീക്കറും സംസാരിക്കുന്നതു കണ്ടു. അവര്‍ ഭരണഘടന വായിച്ചു മനസിലാക്കുന്നത് നന്നായിരിക്കുമെന്ന് എംടി രമേശ് പറഞ്ഞു.

പൗരത്വ നിയമ ഭേദഗതിയുമായി ബന്ധപ്പെട്ട് സര്‍ക്കാര്‍ വിളിച്ച സര്‍വകക്ഷി യോഗത്തില്‍ ബിജെപി പങ്കെടുക്കുന്ന കാര്യത്തില്‍ തീരുമാനമെടുത്തിട്ടില്ല. ഇത്തരത്തില്‍ ഒരു യോഗത്തിന് പ്രസക്തിയൊന്നുമില്ല. എന്നാല്‍ മുഖ്യമന്ത്രി വിളിച്ച യോഗത്തോട് ബിജെപിക്കു നിഷേധാത്മക സമീപനവുമില്ല. പങ്കെടുക്കുകയാണെങ്കില്‍ ഗവര്‍ണര്‍ക്കെതിരെ ഉണ്ടായ പ്രതിഷേധം ഉള്‍പ്പെടെയുള്ള കാര്യങ്ങള്‍ ഉന്നയിക്കുമെന്ന് രമേശ് അറിയിച്ചു.