കോട്ടയം : അഭിപ്രായഭിന്നത രൂക്ഷമായ കേരള കോണ്‍ഗ്രസില്‍ മഞ്ഞുരുകുന്നു. പാലയിലെ യുഡിഎഫ് സ്ഥാനാര്‍ത്ഥിയായ ജോസ് ടോം രാവിലെ പിജെ ജോസഫുമായി കൂടിക്കാഴ്ച നടത്തി. തൊടുപുഴയിലെ ജോസഫിന്റെ വീട്ടിലെത്തിയായിരുന്നു കൂടിക്കാഴ്ച.
പാലാ ഉപതിരഞ്ഞെടുപ്പില്‍ കേരള കോണ്‍ഗ്രസിലെ തര്‍ക്കങ്ങള്‍ തുടരുന്നതിനിടെയാണ് ജോസ് ടോം ജോസഫിനെ കാണാനെത്തിയത്. തിരഞ്ഞെടുപ്പില്‍ പി.ജെ. ജോസഫ് എല്ലാ പിന്തുണയും വാഗ്ദാനം ചെയ്തതായി കൂടിക്കാഴ്ചയ്ക്ക് ശേഷം ജോസ് ടോം പ്രതികരിച്ചു.
പലതവണകണ്ടിരുന്നെങ്കിലും നേരിട്ട് കണ്ട് അനുഗ്രഹം തേടാനാണ് വന്നതെന്നും ജോസ് ടോം പറഞ്ഞു. തന്നെ വീട്ടില്‍ വന്നു കണ്ടതില്‍ സന്തോഷമുണ്ടെന്നും, ജോസ് ടോമിനായി പ്രചാരണത്തിന് ഇറങ്ങുമെന്നും പി ജെ ജോസഫും വ്യക്തമാക്കി. കേരള കോണ്‍ഗ്രസിലെ തര്‍ക്കത്തെ തുടര്‍ന്ന് പാലാ ഉപതെരഞ്ഞെടുപ്പില്‍ കേരള കോണ്‍ഗ്രസ് ജോസഫ് വിഭാഗം പ്രചാരണത്തില്‍ സജീവമായിരുന്നില്ല.
താഴെത്തട്ടുമുതല്‍ ജോസഫ്-ജോസ് കെ മാണി വിഭാഗം പ്രവര്‍ത്തകര്‍ തമ്മില്‍ തര്‍ക്കങ്ങളും നിലനില്‍ക്കുന്നു. ഈ സാഹചര്യത്തില്‍ പ്രചാരണ പ്രവര്‍ത്തനങ്ങളില്‍ യോജിച്ച് നീങ്ങാന്‍ അഭ്യര്‍ത്ഥിക്കാനാണ് ജോസ് ടോമിന്റെ സന്ദര്‍ശനലക്ഷ്യം. നേരത്തെ, പാലായില്‍ യു.ഡി.എഫ്. തിരഞ്ഞെടുപ്പ് കണ്‍വെന്‍ഷനിടെ ജോസഫിനെതിരെ കൂക്കിവിളിച്ചതും, പാര്‍ട്ടി മുഖപത്രത്തില്‍ ജോസഫിനെതിരെ ലേഖനം എഴുതിയതും ഭിന്നത രൂക്ഷമാക്കിയിരുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
