മണ്ഡല- മകര വിളക്ക് തീർഥാടനം; വരുമാനത്തിൽ ഇത്തവണ 95.65 കോടി രൂപയുടെ കുറവ്

ശബരിമല: ഇത്തവണത്തെ മണ്ഡല- മകര വിളക്ക് തീർഥാടന കാലത്ത് ദേവസ്വം ബോർഡിന്റെ വരുമാനത്തിൽ 95.65 കോടി രൂപയുടെ കുറവ്. മണ്ഡല കാലത്ത് 58.91 കോടിയുടെയും മകര വിളക്കിന് 36.73 കോടിയുടെയും കുറവുണ്ടായി. ശനിയാഴ്ച വരെയുളള കണക്കനുസരിച്ചാണിത്.

ഇത്തവണ മകര വിളക്കിന് അരവണയ്ക്ക് 28.32 കോടിയുടെയും അപ്പത്തിന് 3.09 കോടിയുടെയും വിറ്റുവരവ് ലഭിച്ചു. കാണിക്ക ഇനത്തിൽ മകര വിളക്ക് കാലത്ത് 24.57 കോടി രൂപയാണ് ലഭിച്ചത്. 

മണ്ഡല കാലത്തെ ആകെ വരുമാനം 105,11,93,917 രൂപയും മകര വിളക്ക് കാലത്തേത് 63,00,69,947 രൂപയുമാണ്. കഴിഞ്ഞ വർഷം മണ്ഡല കാലത്ത് 164,03,89,374 രൂപയും മകര വിളക്കിന് 99,74,32,408 രൂപയുമായുമായിരുന്നു വരുമാനം.