മീനും തിന്ന് വീട്ടിലെ സോഫ കീറുന്ന ചില പാര്‍ട്ടിക്കാരുണ്ട്; സിപിഐക്കെതിരെ പി.ജയരാജന്‍

കണ്ണൂര്‍: കീഴാറ്റൂര്‍ സമരത്തില്‍ ഐഐക്യദാര്‍ഢ്യം പ്രഖ്യാപിച്ച് രംഗത്തെത്തിയ സിപിഐയ്‌ക്കെതിരെ പരോക്ഷ വിമര്‍ശനവുമായി സിപിഎം കണ്ണൂര്‍ ജില്ലാ സെക്രട്ടി പി.ജയരാജന്‍. മീനും തിന്ന് വീട്ടിലെ സോഫ കേടാക്കുന്ന പൂച്ചകളുടെ സ്വഭാവമാണ് ചില പാര്‍ട്ടികള്‍ക്കെന്ന് ജയരാജന്‍ പറഞ്ഞു. ഇത്രയൊക്കെ ചെയ്താലും വീട്ടിലെ പൂച്ചയെ ആരും കളയാറില്ലെന്നും ജയരാജന്‍ കൂട്ടിച്ചേര്‍ത്തു.

കീഴാറ്റൂരില്‍ വയല്‍നികത്തി ബൈപ്പാസ് നിര്‍മ്മിക്കുന്നതിനെതിരെ സമരം നടത്തുന്ന വയല്‍ക്കിളികള്‍ക്ക് പിന്തുണ പ്രഖ്യാപിച്ച് രംഗത്തെത്തിയ സിപിഐ, സിപിഎം പ്രതിഷേധപ്രകടനം നടത്തിയ ഇന്നുതന്നെ കണ്ണൂരില്‍ വയല്‍ക്കിളികള്‍ക്ക് അനുകൂലമായി സെമിനാര്‍ സംഘടിപ്പിച്ചിരുന്നു. നാട്ടുകാവല്‍ എന്ന പേരില്‍ സിപിഎം സമരം സംഘടിപ്പിച്ചപ്പോള്‍ കീഴാറ്റൂരിന് ബദലുണ്ട് എന്നായിരുന്നു സിപിഐയുടെ പരിപാടിയുടെ പേര്.