കൊച്ചി: മുനമ്പത്തെ അനധികൃത കുടിയേറ്റക്കേസില് അറസ്റ്റിലായ മൂന്നു പ്രതികളേയും കോടതി രണ്ടാഴ്ചത്തേക്ക് റിമാന്ഡ് ചെയ്തു. വെങ്ങാനൂര് സ്വദേശി അനില് കുമാര്, ദില്ലി സ്വദേശികളായ പ്രഭു പ്രഭാകരന്, രവി സനൂപ് എന്നിവരെയാണ് പറവൂര് ഫസ്റ്റ്ക്ലാസ് കോടതി റിമാന്ഡ് ചെയ്തത്. പ്രതികളെ ആലുവ സബ് ജയിലിലേക്ക് മാറ്റി.
അനധികൃത കുടിയേറ്റം, ഗൂഢാലോചന, എമിഗ്രേഷന് ആക്ട്, ഫോറിന് റിക്രൂട്ടിംഗ് ആക്ട്, വ്യാജരേഖ ചമയ്ക്കല് എന്നീ കുറ്റങ്ങളാണ് പ്രതികള്ക്കെതിരെ ചുമത്തിയിരിക്കുന്നത്. രവിയും പ്രഭുവും ആളുകളെ സംഘടിപ്പിക്കാനും പണം പിരിക്കാനും ഇടപെട്ടുവെന്ന് അന്വേഷണ സംഘം സ്ഥിരീകരിക്കുന്നു. ആളുകളെ കൊണ്ടുപോകാന് ഉപയോഗിച്ച ബോട്ട് അനില്കുമാറിന്റെ പേരിലാണെന്നും പൊലീസ് വ്യക്തമാക്കി.
സംഭവത്തിന് പിന്നില് എല്ടിടിഇ ബന്ധമുണ്ടോ എന്ന് ഇതുവരെ സ്ഥിരീകരിച്ചിട്ടില്ലന്ന് ഐജി വിജയ് സാഖറെ വ്യക്തമാക്കി. മുനമ്പത്ത് നിന്ന് ഓസ്ട്രേലിയയിലേക്ക് പോയവരുടെ പട്ടിക പൊലീസ് തയ്യാറാക്കിയിട്ടുണ്ട്. 80 പേരുടെ പട്ടികയാണ് തയ്യാറാക്കിയിരിക്കുന്നത്. ആറ് ദിവസം പ്രായമുള്ള നവജാതശിശു അടക്കം 22 കുട്ടികള് സംഘത്തിലുണ്ടെന്നാണ് പൊലീസിന്റെ വിലയിരുത്തല്. ശ്രീലങ്കന് അഭയാര്ത്ഥി കുടുംബങ്ങളും തമിഴ് നാട്ടുകാരുമാണ് പട്ടികയിലുള്ളത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
