മുസ്ലിം ലീ​ഗ് എംഎൽഎയ്ക്ക് അഭിവാദ്യമർപ്പിച്ച് സ്ഥാപിച്ച ഫ്ലക്സ് ബോർഡ് ചാണകമൊഴിച്ച് വികൃതമാക്കി

മലപ്പുറം: പികെ ബഷീർ എംഎൽഎയ്ക്ക് അഭിവാദ്യമർപ്പിച്ച് സ്ഥാപിച്ച ഫ്ലക്‌സ് ബോർഡ് ചാണകം തളിച്ച് വികൃതമാക്കിയ നിലയിൽ. ചാലിയാർ പഞ്ചായത്തിലെ ഇടിവണ്ണ നാല് സെന്റ് കോളനിയിലെ റോഡ് ടാറിങിന് പികെ ബഷീർ എംഎൽഎയുടെ ആസ്തി വികസന ഫണ്ടിൽ നിന്ന് 10 ലക്ഷം രൂപയും ഗ്രാമ പഞ്ചായത്തംഗം കൃഷ്ണൻകുട്ടി ആറ് ലക്ഷം രൂപയും അനുവദിച്ചിരുന്നു. 

ഇതുമായി ബന്ധപ്പെട്ട് സ്ഥാപിച്ച ബോർഡാണ് ചാണകം തളിച്ച് വികൃമാക്കിയത്. ഇടിവണ്ണ വാർഡ് കോൺഗ്രസ് കമ്മറ്റി പ്രസിഡന്റ് ജോണിയുടെ നേതൃത്വത്തിൽ ശനിയാഴ്ചയാണ് ബോർഡ് വെച്ചത്. 

ശനിയാഴ്ച്ച രാവിലെ 11 മണിയോടെയാണ് എംഎൽഎക്കും ഗ്രാമ പഞ്ചായത്ത് അംഗത്തിനും അഭിവാദ്യമർപ്പിച്ച് കോളനിയിൽ ബോർഡ് വെച്ചത്. കോളനിയിൽ ഒരു വീടിന്റെ വാർപ്പ് കഴിഞ്ഞ് ആളുകൾ മടങ്ങിയത് രാത്രി 11 മണിക്കാണ്. ഇതിന് ശേഷമാണ് സാമൂഹിക ദ്രോഹികൾ ബോർഡിൽ ചാണകം തിളച്ചതെന്ന് വാർഡ് കോൺഗ്രസ് നേതാക്കൾ പറഞ്ഞു.