ന്യൂഡല്‍ഹി: ശബരിമലയില്‍ യുവതീപ്രവേശനം അനുവദിച്ചുകൊണ്ടുള്ള കഴിഞ്ഞ വര്‍ഷത്തെ ഉത്തരവ് ഇപ്പോഴും നിലനില്‍ക്കുന്നതായി ജസ്റ്റിസ് ബിആര്‍ ഗവായ്. കേസില്‍ നിലവിലെ അവസ്ഥ ഇതാണെന്ന്, ശബരിമല ഭരണനിര്‍വഹണം സംബന്ധിച്ച ഹര്‍ജി പരിഗണിക്കുന്നതിനിടെ ജസ്റ്റിസ് ഗവായ് പറഞ്ഞു.
ശബരിമലയില്‍ യുവതീ പ്രവേശനം വിലക്കിക്കൊണ്ടാണ് ഏഴംഗ ബെഞ്ചിന്റെ വിധി വരുന്നതെങ്കില്‍, ക്ഷേത്ര ഉപദേശക സമിതികളില്‍ മൂന്നിലൊന്നു സ്ത്രീകള്‍ക്കു സംവരണം ചെയ്തുകൊണ്ടുള്ള വ്യവസ്ഥ എങ്ങനെ നടപ്പാക്കുമെന്ന് ജസ്റ്റിസ് എന്‍വി രമണ ആരാഞ്ഞിരുന്നു. യുവതീപ്രവേശനം വിലക്കുന്ന പക്ഷം അന്‍പതു വയസിനു മേല്‍ പ്രായമുള്ളവരെയാവും സമിതിയില്‍ ഉള്‍പ്പെടുത്തുന്നതെന്ന് സര്‍ക്കാര്‍ അഭിഭാഷകന്‍ മറുപടി നല്‍കി. ഇതിനു പിന്നാലെയാണ് നിലവില്‍ യുവതീപ്രവേശനം അനുവദിച്ച വിധി നിലനില്‍ക്കുന്നതായി ജസ്റ്റിസ് ഗവായ് പരാമര്‍ശിച്ചത്. ആ വിധി നിലനില്‍ക്കുന്നുണ്ടോ എന്നതാണ് കോടതിക്കു പുറത്തെ പ്രധാന ചര്‍ച്ചയെന്ന് സര്‍ക്കാര്‍ അഭിഭാഷകന്‍ പ്രതികരിച്ചു.
ശബരിമല ക്ഷേത്രത്തിന്റെ ഭരണ നിര്‍വഹണത്തിന് ഗുരുവായൂര്‍, തിരുപ്പതി മാതൃകയില്‍ പ്രത്യേക നിയമം നിര്‍മിക്കണമെന്ന് സുപ്രീം കോടതി സര്‍ക്കാരിന് നിര്‍ദേശം നല്‍കി. നാലാഴ്ചയ്ക്കകം നിയമ നിര്‍മാണം നടത്തണം. ജനുവരി മൂന്നാംവാരം പുതിയ നിയമം ഹാജരാക്കാന്‍ സുപ്രീം കോടതി സംസ്ഥാന സര്‍ക്കാരിനോടു നിര്‍ദേശിച്ചു.
ശബരിമലയ്ക്കായി പ്രത്യേക നിയമം നിര്‍മിക്കണമെന്ന് ഓഗസ്റ്റ് 27ന് സര്‍ക്കാരിനോട് ആവശ്യപ്പെട്ടിരുന്നതാണെന്ന്, പന്തളം കൊട്ടാരത്തിന്റെ ഹര്‍ജി പരിഗണിച്ചുകൊണ്ട് ജസ്റ്റിസ് എന്‍വി രമണയുടെ നേതൃത്വത്തിലുള്ള മൂന്നംഗ ബെഞ്ച് ഓര്‍മിപ്പിച്ചു. പ്രത്യേക നിയമത്തിനു പകരം തിരുവിതാകൂര്‍-കൊച്ചി ഹിന്ദു മതസ്ഥാപന നിയമത്തില്‍ ഭേദഗതി വരുത്തുകയാണ് സര്‍ക്കാര്‍ ചെയ്തത്. ഇതു മതിയായ നടപടിയല്ല. ശബരിമലയ്ക്കു മാത്രമായി പ്രത്യേക നിയമം വേണം- ബെഞ്ച് നിര്‍ദേശിച്ചു.
ഹിന്ദുമതസ്ഥാപന നിയമത്തില്‍ വരുത്തിയ ഭേദഗതികള്‍ പ്രകാരം ക്ഷേത്ര ഉപദേശക സമിതികളില്‍ മൂന്നിലൊന്നു സ്ത്രീകള്‍ക്കു സംവരണം ചെയ്തിട്ടുണ്ട്. ശബരിമല യുവതീ പ്രവേശനം സംബന്ധിച്ച നിയമ പ്രശ്‌നം സുപ്രീം കോടതിയുടെ ഏഴംഗ ബെഞ്ചിന്റെ വിധിക്കു വിധേയമായിരിക്കുന്നത് കോടതി ചൂണ്ടിക്കാട്ടി. ഏഴംഗ ബെഞ്ചിന്റെ വിധി യുവതീപ്രവേശനത്തിന് എതിരാണെങ്കില്‍ എങ്ങനെ ഈ വ്യവസ്ഥ നടപ്പാവുമെന്ന് കോടതി ചോദിച്ചു.
ഏഴംഗ ബെഞ്ചിന്റെ വിധി യുവതീ പ്രവേശനം വിലക്കുകയാണെങ്കില്‍ അന്‍പതു വയസിനു മുകളിലുള്ള സ്ത്രീകളെയായിരിക്കും ക്ഷേത്ര ഉപദേശക സമിതികളില്‍ ഉള്‍പ്പെടുത്തുകയെന്ന് സര്‍ക്കാര്‍ അഭിഭാഷകന്‍ അറിയിച്ചു. ലിംഗനീതി ഉറപ്പാക്കുന്നതിനാണ് ക്ഷേത്ര ഉപദേശക സമിതികളില്‍ സ്ത്രീകള്‍ക്കു സംവരണം ഏര്‍പ്പെടുത്തിയതെന്ന് സര്‍ക്കാര്‍ വ്യക്തമാക്കി.
രാവിലെ കേസ് പരിഗണിച്ചപ്പോള്‍ വര്‍ഷം അന്‍പതു ലക്ഷത്തിലധികം തീര്‍ഥാടകര്‍ എത്തുന്ന ശബരിമലയെ മറ്റു ക്ഷേത്രങ്ങളുമായി താരതമ്യം ചെയ്യുന്നതു ശരിയല്ലെന്ന് ജസ്റ്റിസ് എന്‍വി രമണയുടെ നേതൃത്വത്തിലുള്ള മൂന്നംഗ ബെഞ്ച് നിരീക്ഷിച്ചു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
