വേറെ പണിയൊന്നുമില്ലല്ലോ? തിരക്കുള്ളയാളെന്ന നാട്യം നിര്‍ത്തി രാഹുല്‍ വയനാട്ടില്‍ തങ്ങുകയാണ് വേണ്ടത്: എന്‍എസ് മാധവന്‍ 

വേറെ തിരക്കൊന്നുമില്ലാത്ത രാഹുല്‍ ഗാന്ധി വയനാട്ടില്‍ തങ്ങി പണിയെടുക്കുകയാണ് വേണ്ടതെന്ന് എഴുത്തുകാരന്‍ എന്‍എസ് മാധവന്‍. തിരക്കുള്ളയാളാണെന്ന നാട്യം രാഹുല്‍ അവസാനിപ്പിക്കണമെന്നും മാധവന്‍ ട്വിറ്ററില്‍ കുറിച്ചു.

മാധവന്‍ ട്വിറ്ററില്‍ കുറിച്ചത് ഇങ്ങനെ:

തിരക്കുള്ളയാളാണെന്ന നാട്യം രാഹുല്‍ ഗാന്ധി അവസാനിപ്പിക്കണം. ഇപ്പോള്‍ അദ്ദേഹത്തിന് വേറെ പണിയൊന്നുമില്ല. വീട്ടില്‍ കാത്തിരിക്കാന്‍ ഭാര്യയും കുട്ടികളുമില്ല. അദ്ദേഹം വയനാട്ടില്‍ തങ്ങി പണിയെടുക്കുകയാണ് വേണ്ടത്. അതെങ്ങനെ വേണമെന്ന് സ്ഥലം എംഎല്‍എ ശശീന്ദ്രനെ കണ്ടു പഠിക്കാവുന്നതാണ്.

വയനാട്ടിലെ എംപിയായ രാഹുല്‍, മഴക്കെടുതിയുടെയും ഉരുള്‍പൊട്ടലിന്റെയും പശ്ചാത്തലത്തില്‍ കഴിഞ്ഞ ദിവസം സ്ഥലത്ത് സന്ദര്‍ശനം നടത്തിയിരുന്നു. മലപ്പുറത്തെയും വയനാട്ടിലെയും ക്യാംപുകളിലെത്തിയ അദ്ദേഹം ദുരിത ബാധിതരുമായി സംസാരിച്ചു. എല്ലാവരും ഒറ്റക്കെട്ടായി നിന്നു ദുരന്തത്തെ നേരിടണമെന്ന് അഭിപ്രായപ്പെട്ട രാഹുല്‍ പിറ്റേന്നു മടങ്ങുകയും ചെയ്തു.