സന്നിധാനത്തും വാവര് നടയിലും നാമജപ പ്രതിഷേധം: അനുനയ നീക്കവുമായി പൊലീസ്

ശബരിമല: ശബരിമലയില്‍ വാവര് നടയില്‍ വീണ്ടും നാമജപ പ്രതിഷേധം. 15 പേരോളം ഉള്‍പ്പെട്ട സംഘമാണ് ഇന്ന് പ്രതിഷേധിച്ചത്. വാവര് നടയ്ക്ക് മുന്നിലായിരുന്നു പ്രതിഷേധം. ഇവരെ പൊലീസെത്തി വാവര് നടയില്‍ നിന്നും നീക്കി മാളികപ്പുറം നടപ്പന്തലിന് സമീപത്തേക്ക് മാറ്റി. എന്ത് ആവശ്യം ഉന്നയിച്ചാണ് പ്രതിഷേധമെന്ന് വ്യക്തമല്ല.

അതേസമയം, മലിനമായ സ്ഥലത്തേക്കാണ് തങ്ങളെ മാറ്റിയതെന്ന് പ്രതിഷേധക്കാര്‍ ആരോപിച്ചു. ഇവര്‍ക്കെതിരെ മറ്റ് പൊലീസ് നടപടികള്‍ ഉണ്ടായേക്കില്ലെന്നാണ് വിവരം. എസ്പി ശിവവിക്രം ഉടന്‍ സ്ഥലത്തെത്തി പ്രതിഷേധക്കാരുമായി സംസാരിച്ചു. നിരോധനാജ്ഞ നിലനില്‍ക്കുന്നതിനാല്‍ സംഭവ സ്ഥലത്ത്  നിന്ന് പ്രതിഷേധിക്കാനാവില്ലെന്ന് പൊലീസ് അറിയിച്ചു. തുടര്‍ന്ന് പൊലീസ് പ്രതിഷേധക്കാരെ സ്ഥലത്തുനിന്ന് നീക്കി.

സന്നിധാനത്ത് കഴിഞ്ഞ ദിവസമുണ്ടായ നാമജപ പ്രതിഷേധത്തില്‍ 69 പേരെ അറസ്റ്റ് ചെയ്തിരുന്നു. ഇവരെ പത്തനംതിട്ട മുന്‍സിഫ് കോടതി 14 ദിവസത്തേക്ക് റിമാന്‍ഡ് ചെയ്തിരിക്കുകയാണ്. തിങ്കളാഴ്ച രാത്രിയോടെയാണ് ഇവരെ പൂജപ്പുര സെന്‍ട്രല്‍ ജയിലില്‍ എത്തിച്ചത്. ജയിലിന് മുന്‍പിലും ആളുകള്‍ നാമജപപ്രതിഷേധം നടത്തിയിരുന്നു. ഇതിനു പിന്നാലെയാണ് സന്നിധാനത്ത് വീണ്ടും നാമജപ പ്രതിഷേധം.