സ്കൂളിൽ നിന്നും വീട്ടിലേക്ക് പോയ ഒമ്പതാംക്ലാസുകാരിയെ ബൈക്കിലെത്തിയ സംഘം തട്ടിക്കൊണ്ടുപോയി; സംഘം ചേർന്ന് പീഡിപ്പിച്ചു; നാലുപേർ അറസ്റ്റിൽ

തിരുവനന്തപുരം : സ്കൂളിൽ നിന്നു വീട്ടിലേക്കു വരികയായിരുന്ന ഒൻപതാം ക്ലാസുകാരിയെ തട്ടിക്കൊണ്ടുപോയി സംഘം ചേർന്നു പീഡിപ്പിച്ച കേസിൽ നാലുപേർ അറസ്റ്റിൽ. വെട്ടുതുറ സ്വദേശി സോജൻ(23), മര്യനാട് സ്വദേശികളായ അഭിലാഷ്(25), ടോമി(23), നിരഞ്ജൻ(20) എന്നിവരെയാണ് പോക്സോ നിയമപ്രകാരം അറസ്റ്റ് ചെയ്തത്.

ഹോസ്റ്റലിൽ താമസിച്ചു പഠിക്കുന്ന പെൺകുട്ടി വെള്ളിയാഴ്ച വൈകിട്ട് സ്കൂളിൽ നിന്നു വീട്ടിലേക്കു വരുമ്പോഴായിരുന്നു സംഭവം.  ബൈക്കിൽ വന്ന നാലംഗ സംഘം ഒൻപതാം ക്ലാസുകാരിയെ തട്ടിക്കൊണ്ടുപോകുകയായിരുന്നു. സംഘം ചേർന്ന് പീഡിപ്പിച്ചശേഷം കുട്ടിയെ പിറ്റേന്ന് രാവിലെ   തുമ്പ ഭാഗത്തു റോഡിൽ ഇറക്കിവിടുകയായിരുന്നുവെന്ന് കഠിനംകുളം പൊലീസ് അറിയിച്ചു.

പെൺകുട്ടി അറിയിച്ചത് അനുസരിച്ചു വീട്ടുകാർ നൽകിയ പരാതിയിന്മേൽ അന്വേഷണം നടത്തിയ പൊലീസ് നാലംഗ സംഘത്തെ പിടികൂടുകയായിരുന്നു. കോവളം, വർക്കല ബീച്ചുകളിൽ കൊണ്ടുപോയി പീഡിപ്പിച്ചെന്നാണ് വിദ്യാർഥിനി പൊലീസിൽ മൊഴി നൽകിയത്. പ്രതികൾ ലഹരിമരുന്ന് ഉപയോഗിക്കുന്നവരാണെന്നു വ്യക്തമായിട്ടുണ്ടെന്ന് അന്വേഷണത്തിനു നേതൃത്വം നൽകുന്ന ആറ്റിങ്ങൽ ഡിവൈഎസ്പി കെ.എ.വിദ്യാധരൻ അറിയിച്ചു.