നെടുമങ്ങാട് ആര്‍എസ്എസ് കാര്യാലയത്തില്‍ പൊലീസ് റെയ്ഡ്; വാള്‍, കത്തി കണ്ടെടുത്തു

തിരുവനന്തപുരം: നെടുമങ്ങാട് ആര്‍എസ്എസ് കാര്യാലയത്തില്‍ പൊലീസ് റെയ്ഡ്. ബോംബേറ് അടക്കമുള്ള ഹര്‍ത്താല്‍ ദിനത്തിലെ ആക്രമണ പശ്ചാത്തലത്തിലാണ് നടപടി. 

നെടുമങ്ങാട് പൊലീസ് സ്‌റ്റേഷനു നേര്‍ക്ക് ബോംബെറിഞ്ഞ കേസില്‍ ബിജെപി നിയോജകമണ്ഡലം പ്രസിഡന്റ് പൂവത്തൂര്‍ ജയനെ കഴിഞ്ഞ ദിവസം പൊലീസ് അറസ്റ്റ് ചെയ്തിരുന്നു.  സ്‌റ്റേഷന്‍ ആക്രമണത്തിന്റെ ഗൂഢാലോചനയിലും സംഘര്‍ഷത്തിലും ജയനു പങ്കുണ്ടെന്നാണ് പൊലീസിന്റെ കണ്ടെത്തല്‍.

ഹര്‍ത്താല്‍ ദിനത്തില്‍ എസ്‌ഐയെയും പൊലീസ് സംഘത്തെയും ആക്രമിച്ച കേസില്‍ പിടിയിലായ പ്രതികളെ മോചിപ്പിക്കാനെത്തിയ ആര്‍എസ്എസ്, ബിജെപി പ്രവര്‍ത്തകരാണ് പൊലീസ് സ്‌റ്റേഷന്‍ ആക്രമിച്ചത്. ആര്‍എസ്എസ് നെടുമങ്ങാട് ജില്ലാ പ്രചാരക് പ്രവീണ്‍, നിഷാന്ത് എന്നിവര്‍ നെടുമങ്ങാട് പൊലീസ് സ്‌റ്റേഷനിലേക്ക് ബോംബെറിയുന്നതിന്റെ സിസിടിവി ദൃശ്യങ്ങളും പുറത്തുവന്നിരുന്നു. സംഭവത്തിന് പിന്നാലെ നിഷാന്തും പൊലിസ് പിടിയിലായിരുന്നു. ജില്ലാ പ്രചാരക് പ്രവീണ്‍ സംഭവശേഷം ഒളിവിലാണ്.