ഹർത്താലിൽ അക്രമം; സ്വകാര്യ വാഹനങ്ങൾ തടയുന്നു, കെഎസ്ആർടിസിക്ക് നേരെ കല്ലേറ്

തിരുവനന്തപുരം: കാസർകോട് പ്രവർത്തകരെ വെട്ടിക്കൊലപ്പെടുത്തിയതിൽ പ്രതിഷേധിച്ച് യൂത്ത് കോൺ​ഗ്രസ് ആഹ്വാനം ചെയ്ത ഹർത്താലിൽ അങ്ങിങ്ങായി അക്രമം. പുലർച്ചെ ആറ് മണിക്കാണ് ഹർത്താൽ ആരംഭിച്ചത്. സ്വകാര്യവാഹനങ്ങൾ സംസ്ഥാന വ്യാപകമായി തടയുന്നുണ്ട്. പലയിടങ്ങളിലും സ്വകാര്യബസുകൾ സർവ്വീസ് നിർത്തിവച്ചിട്ടുണ്ട്.

കോഴിക്കോട് കുന്ദമം​ഗലത്തും പന്തീർപാടത്തും കെഎസ്ആർടിസി ബസുകൾക്ക് നേരെ കല്ലേറുണ്ടായി. ബാലുശ്ശേരി, വടകര, നാദാപുരം എന്നിവിടങ്ങളിൽ പ്രതിഷേധക്കാർ  വാഹനങ്ങൾ തടഞ്ഞിരുന്നു. കാസർകോട് ന​ഗരത്തിൽ യൂത്ത് കോൺ​ഗ്രസ് പ്രവർത്തകർ നടത്തിയ മാർച്ച് അക്രമാസക്തമായതിനെ തുടർന്ന് പൊലീസ് ലാത്തി വീശിയിരുന്നു.

 പാലക്കാട് വാളയാറിൽ കെഎസ്ആർടിസി ബസിന് നേരെയും തമിഴ്നാട് ട്രാൻസ്പോർട്ട് കോർപറേഷന്റെയും ബസുകൾക്ക് നേരെയും കല്ലേറുണ്ടായി. മധ്യകേരളത്തിലെ ജില്ലകളിൽ ഹർത്താൽ സമാധാനപരമായി പുരോ​ഗമിക്കുകയാണ്. ഹർത്താലുമായി സഹകരിക്കരുതെന്ന് വ്യാപാരി വ്യവസായി ഏകോപന സമിതി ആവശ്യപ്പെട്ടിട്ടുണ്ട്. എറണാകുളം ജില്ലയിൽ തുറന്ന് പ്രവർത്തിക്കുന്ന കടകൾക്ക് സംരക്ഷണം നൽകുമെന്ന് ജില്ലാ കളക്ടർ അറിയിച്ചു. 

തിരുവനന്തപുരം ആറ്റിങ്ങലിൽ കെഎസ്ആർടിസി ബസ് തടഞ്ഞ അഞ്ച് യൂത്ത് കോൺ​ഗ്രസ് പ്രവർത്തകരെ പൊലീസ് അറസ്റ്റ് ചെയ്ത് നീക്കി.കിളിമാന്നൂരിൽ കടകൾ നിർബന്ധിതമായി അടപ്പിച്ചിരുന്നു. സഞ്ചാര സ്വാതന്ത്ര്യം തടഞ്ഞാൽ കർശന നിയമനടപടിയുണ്ടാകുമെന്ന് ഡിജിപി വ്യക്തമാക്കി.