അനുമതിയില്ലാതെ പ്രവേശിച്ചു; അഫ്ഗാൻ സൈനിക വിമാനം ഉസ്ബെക്കിസ്ഥാൻ വെടിവച്ചു വീഴ്ത്തി

താഷ്‌കന്റ്: വ്യോമാതിർത്തി ലംഘിച്ച് പ്രവേശിച്ച അഫ്ഗാൻ സൈനിക വിമാനം ഉസ്ബെക്കിസ്ഥാൻ വെടിവച്ചു വീഴ്ത്തി. ഞായറാഴ്ച വൈകീട്ട് ഉസ്ബക്കിസ്ഥാന്റെ തെക്കൻ പ്രവിശ്യയായ സുർക്കോൺഡറിയോയിൽ ആണ് വിമാനം വീണത്. ഉസ്ബക്കിസ്ഥാൻ പ്രതിരോധ മന്ത്രാലയമാണ് ഇക്കാര്യം വെളിപ്പെടുത്തിയത്.

ഉസ്ബക്കിസ്ഥാന്റെ വ്യോമാതിർത്തിയിൽ അനുമതിയില്ലാതെ പറന്ന വിമാനമാണ് ഉസ്ബെക്കിസ്ഥാൻ വ്യോമസേന വെടിവച്ച് വീഴ്ത്തിയത്. വിമാനത്തിലുണ്ടായിരുന്ന രണ്ട് അഫ്​ഗാൻ സൈനിക ഉദ്യോ​​​ഗസ്ഥർക്ക് പരിക്കേറ്റു. വിമാനം തകരുന്നതിനു മുൻപ് സൈനികർ പാരച്യൂട്ട് ഉപയോഗിച്ച് ചാടി രക്ഷപ്പെട്ടതായാണ് റിപ്പോർട്ട്. 

സുർക്കോൺഡറിയോയിലെ ഒരു ആശുപത്രിയിൽ അഫ്ഗാൻ സൈനിക യൂണിഫോം ധരിച്ച രണ്ട് പേർ ചികിത്സയിൽ കഴിയുന്നുണ്ടെന്ന് ആശുപത്രിയിലെ ഡോക്ടറെ ഉദ്ധരിച്ച് വാർത്താ ഏജൻസിയായ എഎഫ്പി റിപ്പോർട്ട് ചെയ്തു.