ഹജ്ജ്​ തീർഥാടകർക്ക് കോവിഡ് വാക്സിൻ നിർബന്ധം: സൗദി ആരോഗ്യമന്ത്രാലയം 

മക്ക: ഈ വർഷം ഹജ്ജിനെത്തുന്ന തീർഥാടകർ നിർബന്ധമായും കോവിഡ് വാക്സിനേഷൻ പൂർത്തിയാക്കണമെന്ന് സൗദി ആരോഗ്യ മന്ത്രാലയം. വിദേശങ്ങളിൽ നിന്ന് എത്തുന്ന ഹജ്ജ് തീർഥാടകർ ലോകാരോഗ്യ സംഘടന അംഗീകരിച്ച രണ്ട് ഡോസ് വാക്സിൻ പൂർത്തിയാക്കണം. സൗദിയിൽ എത്തുന്നതിന് ഒരാഴ്ച മുമ്പെങ്കിലും രണ്ടാമത്തെ വാക്സിൻ സ്വീകരിച്ചിരിക്കണമെന്നും നിർദേശമുണ്ട്. 

കോവിഡ് കാലത്ത് ഹജ്ജ് തീർത്ഥാടന് അനുമതി ലഭിക്കാൻ കോവിഡ് വാക്സിൻ സ്വീകരിച്ചവരായിരിക്കണമെന്നത് പ്രധാന വ്യവസ്ഥകളിൽ ഒന്നാണെന്ന് കഴിഞ്ഞ ദിവസം സൗദി ആരോഗ്യമന്ത്രി ഡോ. തൗഫീഖ് അൽറബീഅ പ്രഖ്യാപിച്ചിരുന്നു. സൗദിയിൽ നിന്ന് ഹജ്ജിനെത്തുന്നവർ ദുൽഹജ്ജ് ഒന്നിന് മുമ്പ് രണ്ട് ഡോസ് വാക്സിൻ സ്വീകരിച്ചിരിക്കണം.

18 മുതൽ 60 വയസ് വരെ പ്രായമുള്ളവർക്ക് മാത്രമാണ് ഇക്കുറി ഹജ്ജിന് അനുമതി നൽകുക. തീർഥാടകർ സൗദിയിൽ പ്രവേശിക്കുന്നതിന് 72 മണിക്കൂർ മുമ്പ് അംഗീകൃത ലബോറട്ടറിയിൽ നിന്നുള്ള കോവിഡ് പരിശോധന നടത്തിയ രേഖ സമർപ്പിക്കണമെന്നും വ്യവസ്ഥയുണ്ട്.