'ട്രംപ് സമാധാനം കെട്ടിപ്പടുക്കുന്നു'; നൊബേല്‍ സമ്മാനത്തിന് നാമ നിര്‍ദേശം ചെയ്ത് നെതന്യാഹു

വാഷിങ്ടണ്‍: യുഎസ് പ്രസിഡന്റ് ഡോണള്‍ഡ് ട്രംപിനെ സമാധാനത്തിനുള്ള നൊബേല്‍ സമ്മാനത്തിന് നാമനിര്‍ദേശം ചെയ്തതായി ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹു. വൈറ്റ് ഹൗസില്‍ നടന്ന അത്താഴ വിരുന്നിനിടെയാണ് നെതന്യാഹു ഇക്കാര്യം അറിയിച്ചത്. ഒന്നിനു പുറകേ ഒന്നായി ട്രംപ് സമാധാനം കെട്ടിപ്പടുക്കുകയാണെന്ന് നെതന്യാഹു പറഞ്ഞു.

മിസ്റ്റര്‍ പ്രസിഡന്റ്, നൊബേല്‍ സമ്മാന കമ്മിറ്റിക്ക് അയച്ച കത്ത് നിങ്ങള്‍ക്ക് മുന്നില്‍ അവതരിപ്പിക്കാന്‍ ഞാന്‍ ആഗ്രഹിക്കുന്നു. സമാധാന സമ്മാനത്തിന് നിങ്ങളെ നാമനിര്‍ദേശം ചെയ്യുന്നു. നിങ്ങള്‍ അതിന് അര്‍ഹനാണ്, ബെഞ്ചമിന്‍ നെതന്യാഹു പറഞ്ഞു. വളരെ നന്ദി. ഇതുസംബന്ധിച്ച് എനിക്കറിയില്ലായിരുന്നു. വൗ, വളരെ നന്ദി. ഇത് വളരെ അര്‍ഥവത്തായതാണ്. നാമനിര്‍ദേശത്തെ സംബന്ധിച്ച കത്ത് ലഭിച്ച ശേഷം ട്രംപ് പ്രതികരിച്ചു. നിങ്ങളുടെ നേതൃത്വത്തിന് എല്ലാ ഇസ്രായേലികളുടെ മാത്രമല്ല, ജൂത ജനതയുടേയും ലോകമെമ്പാടുമുള്ള നിരവധി മനുഷ്യരുടേയും അഭിനന്ദനവും ആദരവും പ്രകടിപ്പിക്കാന്‍ ഞാന്‍ ആഗ്രഹിക്കുന്നു, നെതന്യാഹു പറഞ്ഞു.

അത്താഴ വിരുന്നിന്റെ തുടക്കത്തില്‍, നെതന്യാഹുവിനും ഭാര്യ സാറയ്ക്കും ആതിഥേയത്വം വഹിക്കാന്‍ കഴിഞ്ഞതില്‍ അഭിമാനമുണ്ടെന്ന് ട്രംപ് പറഞ്ഞു. അവരെ ദീര്‍ഘകാല സുഹൃത്തുക്കളാണെന്ന് വിശേഷിപ്പിക്കുകയും ചെയ്തു. ബിബി (ബെഞ്ചമിന്‍ നെതന്യാഹു)യും സാറയും ഞങ്ങളോടൊപ്പം ഉണ്ടായിരിക്കുന്നത് ഒരു ബഹുമതിയാണ്. വളരെക്കാലമായി അവര്‍ എന്റെ സുഹൃത്തുക്കളാണ്, ഞങ്ങള്‍ ഒരുമിച്ച് വലിയ വിജയം നേടിയിട്ടുണ്ട്, ഭാവിയില്‍ ഇത് കൂടുതല്‍ വലിയ വിജയമായി മാറുമെന്ന് ഞാന്‍ കരുതുന്നു, ട്രംപ് പറഞ്ഞു. ഇറാന്റെ ആണവ കേന്ദ്രങ്ങളില്‍ അടുത്തിടെ അമേരിക്ക നടത്തിയ വ്യോമാക്രമണങ്ങളുടെ പശ്ചാത്തലത്തില്‍, ചര്‍ച്ചകള്‍ നടത്താനുള്ള ഇറാന്റെ അഭ്യര്‍ത്ഥന അമേരിക്ക അംഗീകരിച്ചതായി ട്രംപ് സ്ഥിരീകരിച്ചു.