ജീവനുള്ള മീനിനെ നഖങ്ങൾക്കിടയിൽ ഇട്ട് മാനിക്യൂർ; നെയിൽ ആർട്ടിസ്റ്റിന് വിമർശനം, വിഡിയോ 

ഫാഷനിൽ പുതിയ ട്രെൻഡുകൾ അവതരിപ്പിക്കാൻ ആഗ്രഹിക്കുന്നവരാണ് അധികവും. ഇത്തരത്തിൽ മുമ്പ് സെലിബ്രിറ്റികൾക്കിടയിൽ മാത്രം വ്യാപകമായിരുന്ന എന്നാലിപ്പോൾ സാധാരണക്കാർക്കിടയിലും തരം​ഗമാകുന്ന ഒന്നാണ് നെയിൽ ആർട്ട്. ദിവസവും വ്യത്യസ്ത ഡിസൈനും രീതികളും പരീക്ഷിക്കപ്പെടുന്ന ഒരു ഫാഷൻ രം​ഗമാണ് ഇത്. ഇപ്പോഴിതാ ജീവനുള്ള മീനുകളെ ഉപയോ​ഗിച്ച് ചെയ്ത ഒരു നെയിൽ ആർട്ട് ആണ് സോഷ്യൽ മീഡിയയിൽ വൈറലാകുന്നത്. 

ദുബായിലെ നെയിൽ ആർട്ട് സലൂണായ നെയിൽ സണ്ണി ആണ് പുതിയ പരീക്ഷണം അവതരിപ്പിച്ചത്. അക്വേറിയം മാനിക്യൂർ എന്ന് പേരിട്ട ഈ പരീക്ഷണത്തിൽ ജീവനുള്ള മീനുകളെ ഉപയോ​ഗിച്ചാണ് ഡിസൈൻ. 1970കളിൽ പ്രസിദ്ധമായിരുന്ന ഫിഷ് ടാങ്ക് പ്ലാറ്റ്‌ഫോം ഷൂവിൽ നിന്ന് പ്രചോദനം ഉൾക്കൊണ്ടാണ് ഈ മാനിക്യൂർ പരീക്ഷണം..

നഖത്തെ രാകി മിനുക്കി നീളം കൂടാനുള്ള അക്രലിക് ഡിസൈൻ ഒട്ടിച്ച ശേഷമാണ് മീനിനെ ഉപയോഗിച്ച് ഫൈനൽ ടച്ച് നൽകിയത്. ഈ വിഡിയോ ഒരു മാതൃക മാത്രമാണെന്നും ഷൂട്ടിങ്ങിനിടയിൽ മീനുകളെ ഉപദ്രവിച്ചിട്ടില്ലെന്നും നെയിൽ സണ്ണി ഇൻസ്റ്റ​ഗ്രാമിൽ കുറിച്ചു. വിഡിയേയ്ക്ക് ശേഷം മീനിനെ ടാങ്കിലേക്ക് തന്നെ തിരികെവിടുന്നതും കാണാം. എന്നാൽ ഈ സംഭവത്തെ വിമർശിച്ച് നിരവധി കമന്റുകളാണ് വിഡിയോയ്ക്ക് ലഭിക്കുന്നത്. മീനുകളെ ഉപദ്രവിച്ചില്ലെന്ന് എങ്ങനെ പറയാൻ കഴിയുമെന്ന് പലരും ചോദിക്കുന്നുണ്ട്. മൂനുകൾക്ക് ശ്വസിക്കണമെങ്കിൽ മുന്നോട്ട് നീങ്ങണമെന്ന് പറഞ്ഞാണ് ഇവർ വിമർശനമുന്നയിക്കുന്നത്.