അമേരിക്കയിലെ നൈറ്റ് ക്ലബിലുണ്ടായ വെടിവെപ്പില്‍ ഒരാള്‍ കൊല്ലപ്പെട്ടു

സിന്‍സിനാറ്റി: അമേരിക്കയിലെ നൈറ്റ് ക്ലബിലുണ്ടായ ആക്രമണത്തില്‍ ഒരാള്‍ കൊല്ലപ്പെട്ടു. രണ്ടുപേര്‍ക്ക് പരിക്കേറ്റു. ഒഹായോയിലെ സിന്‍സിനാറ്റിയിലെ നൈറ്റ് ക്ലബിലാണ് ഞായറാഴ്ച പുലര്‍ചെ 1.30ന് വെടിവെപ്പുണ്ടായത്. പരിക്കേറ്റവരെ ആശുപത്രിയിലേക്ക് മാറ്റിയിട്ടുണ്ട്.

വെടിവെപ്പ് സിന്‍സിനാറ്റി പോലീസ് സ്ഥിരീകരിച്ചിട്ടുണ്ട്. നൈറ്റ് ക്ലബില്‍ ഉണ്ടായിരുന്നവരിലധികവും യുവാക്കളായിരുന്നെന്ന് പോലീസ് പറഞ്ഞു. പരിക്കേറ്റവരില്‍ ഒരാളുടെ നില ഗുരുതരമാണ്. വെടിവെപ്പിനു ശേഷം ആക്രമികള്‍ രക്ഷപ്പെടുകയായിരുന്നു. ഇവരെ തിരിച്ചറിയാന്‍ സിസിടിവി ദൃശ്യങ്ങള്‍ ഉള്‍പ്പെടെ പോലീസ് പരിശോധിച്ചു വരികയാണ്. 

വെടിവെപ്പിനു പിന്നില്‍ ഭീകരരാണെന്ന സൂചനയില്ലെന്ന് പോലിസ് പറഞ്ഞു. അക്രമികളെക്കുറിച്ച് വിവരം ലഭിക്കുന്നവര്‍ പോലീസിനെ അറിയിക്കണമെന്നും അധികൃതര്‍ അഭ്യര്‍ഥിച്ചു. കഴിഞ്ഞ വര്‍ഷം അമേരിക്കയിലെ ഓര്‍ലാന്‍ഡോയിലുള്ള ഗേ നൈറ്റ് ക്ലബിലുണ്ടായ വെടിവെപ്പില്‍ 49 പേര്‍ കൊല്ലപ്പെട്ടിരുന്നു. അതിന്റെ വാര്‍ഷികം അടുക്കുമ്പോഴാണ് വീണ്ടും ആക്രമണം.