വെറുതെ കിടക്കാൻ തയ്യാറുണ്ടോ; സ്വന്തമാക്കാം 13 ലക്ഷം രൂപ!

ബർലിൻ: കിടക്കയിൽ 60 ദിവസം വെറുതെ കിടന്നാൽ മതി. എഴുന്നേൽക്കുമ്പോൾ 13 ലക്ഷം രൂപ കൈയിൽ കിട്ടും. ഭാരമില്ലായ്മ എങ്ങനെ മനുഷ്യ ശരീരത്തെ എങ്ങനെ ബാധിക്കുമെന്നു ശാസ്ത്രജ്ഞർക്കു പഠിക്കാനായാണ് ഈ കിടപ്പ്. യൂറോപ്യൻ ബ​ഹിരാകാശ ഏജൻസി, നാസ എന്നിവയുമായി സഹകരിച്ചു ജർമൻ എയ്റോസ്പേസ് സെന്ററാണ് (ഡിഎൽആർ) പഠനം നടത്തുന്നത്. 

ശൂന്യാകാശത്ത് കൂടുതൽ കാലം കഴിയേണ്ടി വരുന്ന ബഹിരാകാശ യാത്രികർക്ക് ഉണ്ടായേക്കാവുന്ന അസ്ഥി, പേശീക്ഷയത്തെ പ്രതിരോധിക്കാനുള്ള വഴി കണ്ടെത്താനാണ് ആർട്ടിഫിഷ്യൽ ​ഗ്രാവിറ്റി ബെഡ് റെസ്റ്റ് സ്റ്റഡി (എജിബിആർഇഎസ്എ) എന്ന പഠനം. ഇതിന് സ്വയം സന്നദ്ധരായി എത്തുന്നവർക്ക് 13 ലക്ഷം രൂപയാണ് വാ​ഗ്ദാനം. 

ഭാരമില്ലായ്മ മൂലം മനുഷ്യ ശരീരത്തിലുണ്ടാവുന്ന പ്രശ്നങ്ങളെ കൃത്രിമ ​ഗുരുത്വാകർഷണത്തിലൂടെ പ്രതിരോധിക്കുകയാണ് ലക്ഷ്യം. 12 വീതം പുരുഷൻമാരെയും സ്ത്രീകളേയുമാണ് പരീക്ഷണത്തിന് വേണ്ടത്. മൂന്ന് മാസത്തെ പഠനത്തിനിടയിൽ ദിവസവും മൂന്ന് രണ്ട് ആളുകൾ മാറി മാറി വരും. 

ബ​ഹിരാകാശ യാത്രികർക്ക് സമാനമായ സാഹചര്യം ഒരുക്കാനായി പ്രത്യേകം തയ്യാറാക്കിയ പരീക്ഷണ മുറിയിൽ തല ഭാഹത്തേയ്ക്ക് ആറ് ഡി​ഗ്രി ചെരിവുള്ള കിടക്കകളിലാണ് കിടക്കേണ്ടത്. പരീക്ഷണത്തിനിടയിൽ ഭക്ഷണം കഴിക്കുന്നതുൾപ്പെടെയുള്ള കാര്യങ്ങൾ കിടന്നു തന്നെ ചെയ്യണം. ലോകത്ത് ആദ്യമായാണ് ഈ രീതിയിൽ പരീക്ഷണം നടക്കുന്നത്.