വ്യായാമം -ഇവി സുജനപാല്‍ എഴുതിയ കവിത

ഇരുന്നു കൊണ്ട്

പ്രഭാതസവാരി നടത്തുന്ന

ഒരു സുഹൃത്തെനിക്കുണ്ട്.

ഓടാതെ

വിയര്‍ക്കുന്ന കഥകള്‍ പറയാന്‍

മിടുക്കനാണ്.

നടക്കാതെ തന്നെ

നടന്നതു പോലെ പറയും.

ഇല്ലാത്തതിനെ

ഉള്ളതാക്കി പൊലിപ്പിക്കും.

അപ്പോള്‍,

വയറ് താനേ

കുലുങ്ങിച്ചിരിക്കും.

നാവുകൊണ്ട്

ലോക രാജ്യങ്ങളില്‍

മാരത്തോണ്‍ നടത്തി

തിരിച്ചു വരും.

ഈയിടെ

നാടു കിതക്കുന്നതു പോലെ

അനങ്ങുമ്പോള്‍

അയാള്‍ കിതക്കും'

ഇപ്പോള്‍,

കെട്ടാതെ കെട്ടിപ്പടുത്ത്

സ്വയം വീര്‍ത്തു

വീര്‍ത്തു വന്ന്

ശ്വാസം നിലച്ച് പൊട്ടാറായ

പ്രത്യയശാസ്ത്രം പോലെയായി

അയാളുടെ ശരീരം

ഇനി, ശരിക്കും

ഒന്ന് കൈകാല്‍

നിവര്‍ത്തിയാല്‍ത്തന്നെ

വീടിനോ,

നാടിനോ,

ഭൂമിക്കോ

എങ്ങിനെ താങ്ങാനാകും

ആ ഭാരം.....?