ഇ.എം. സുരജ എഴുതിയ കവിത ‘ഭൂമിയാകാന്‍ ഇനി എന്തു ചെയ്യുമെന്നാണ്’

ഭൂമി എത്രമേൽ ഭൂമിയായിട്ടും

അവളെ ഭൂമി എന്നു വിളിക്കാൻ

പലരും മടിച്ചു;

ഭൂമിയാണ് എന്നതിന്

എന്തെങ്കിലും തെളിവുസംഘടിപ്പിക്കാൻ

ശ്രമിക്കാഞ്ഞിട്ടല്ല:

പല കാരണങ്ങൾ കൊണ്ട്

അതു നിഷേധിക്കപ്പെട്ടു;

പല പല ഭൂമികൾക്കിടയിൽ

അതെളുപ്പവുമല്ല

എന്നവൾ മനസ്സിലാക്കി

നീ ശരിക്കും ഭൂമി തന്നെയാണെന്ന്,

നിന്നെ ഞങ്ങളല്ലാതെ

ആരാണറിഞ്ഞിട്ടുള്ളതെന്ന്,

പുല്ലുകളും ഉറുമ്പുകളും

തലോടുമ്പോൾ മാത്രം

അവൾ

ചെറുതായൊന്ന് ആശ്വസിക്കും;

ക്ഷണികവും മിഥ്യാവലയിതവുമായ

ആശ്വാസം!

വന്നുവന്നിപ്പോൾ

അവൾക്കു തന്നെത്തന്നെ

സംശയമായിത്തുടങ്ങിയിട്ടുണ്ട്,

അപ്പൊഴൊക്കെ തിരുത്തുകയും ചെയ്യും:

ഭൂമിയാകാൻ മോഹമുണ്ടെന്നേ ഉള്ളൂ,

ശരിക്കുമായിട്ടില്ലാത്തതുകൊണ്ടാണ്

ഇങ്ങനെയൊക്കെ എന്ന്!