ക്വലാലംപുര്: 'സ്നേക്സ് ഓണ് എ പ്ലെയ്ന്' സിനിമയെ അനുസ്മരിക്കുന്ന രംഗങ്ങളാണ് കഴിഞ്ഞദിവസം എയര് ഏഷ്യ വിമാനത്തില് സംഭവിച്ചത്.
മലേഷ്യയിലെ ക്വലാലംപുരില്നിന്ന് തവൗവിലേക്കുള്ള വിമാനത്തിലാണ് വ്യാഴാഴ്ച പാമ്പ് യാത്രക്കാരെ ഭയപ്പെടുത്തിയത്.
യാത്രക്കാര് പകര്ത്തിയ വിമാനത്തിനുള്ളിലെ പാമ്പിന്റെ ദൃശ്യങ്ങള് ഇപ്പോള് സാമൂഹ്യമാധ്യമങ്ങളില് വൈറലായിരിക്കുകയാണ്. വിമാനത്തില് മുകള്ഭാഗത്ത് ലഗേജുകള് വെക്കുന്നതിന് ഉള്ളിലായിരുന്നു പാമ്പ്. സുതാര്യമായ ഒരു ഭാഗത്തുകൂടിയാണ് ഉള്ളിലുള്ള പാമ്പിനെ യാത്രക്കാര് കണ്ടത്.
വിമാനത്തില് പാമ്പുണ്ടെന്നറിഞ്ഞ് യാത്രക്കാര് പരിഭ്രാന്തരായി. അടിയന്തര സാഹചര്യം പരിഗണിച്ച് പൈലറ്റ് വിമാനം വഴിതിരിച്ചുവിടുകയും കുച്ചിങ് വിമാനത്താവളത്തില് ഇറക്കുകയും ചെയ്തു. തുടര്ന്ന് ഇവിടെവെച്ച് ജീവനക്കാര് വിമാനം പരിശോധിക്കുകയും പാമ്പിനെ പിടികൂടുകയും ചെയ്തു. അതിനുശേഷം വിമാനം തവൗവിലേക്കുള്ള യാത്ര തുടര്ന്നു. യാത്രക്കാരില് ആര്ക്കും പാമ്പ് കാരണം അപായമൊന്നും സംഭവിച്ചിട്ടില്ലെന്ന് അധികൃതര് വ്യക്തമാക്കി.
പാമ്പ് എങ്ങനെയാണ് വിമാനത്തില് കയറിക്കൂടിയതെന്ന് വ്യക്തമല്ല. ബാഗുകളില് കയറിപ്പറ്റിയ പാമ്പ് വിമാനത്തിനുള്ളില് എത്തിയതാകാമെന്നാണ് നിഗമനം. എന്നാല് യാത്രക്കാരില് ആരെങ്കിലും രഹസ്യമായി ബാഗിനുള്ളില് ഒളിപ്പിച്ച് പാമ്പിനെ കടത്താന് ശ്രമിച്ചതാകാമെന്ന് അഭിപ്രായപ്പെടുന്നവരുമുണ്ട്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
