വാഷിങ്ടണ്: അമേരിക്കന് ശതകോടീശ്വരനും ലൈംഗിക കുറ്റവാളിയുമായ ജെഫ്രി എപ്സ്റ്റീന്റെ പക്കലുള്ള പ്രമുഖരുടെ സെക്സ് ടേപ്പുകളില് യുഎസ് പ്രസിഡന്റ് ഡോണള്ഡ് ട്രംപിന്റെ പേരുമുണ്ട് എന്ന ആരോപണത്തില്നിന്ന് പിന്വാങ്ങി സ്പേസ് എക്സ് ഉടമ ഇലോണ് മസ്ക്. എക്സില് പങ്കുവെച്ച പോസ്റ്റ് മസ്ക് പിന്വലിച്ചു. തെറ്റിപ്പിരിഞ്ഞതിന് പിന്നാലെ ട്രംപിനെതിരെ ഗുരുതരമായ പല ആരോപണങ്ങളും ഉന്നയിച്ച് മസ്ക് രംഗത്ത് വന്നിരുന്നു. അതില് ഏറ്റവും ഗൗരവകരമായ വിഷയമായിരുന്നു ജെഫ്രി എപ്സ്റ്റീന്റെ സെക്സ് ടേപ്പുമായി ബന്ധപ്പെട്ട ആരോപണം.
എപ്സ്റ്റീന്റെ ബാലപീഡന പരമ്പരയില് ട്രംപിനും പങ്കുണ്ട് എന്നായിരുന്നു മസ്ക് വ്യാഴാഴ്ച എക്സില് കുറിച്ചത്. ആ കേസിന്റെ റിപ്പോര്ട്ട് ട്രംപ് രഹസ്യമാക്കി വെച്ചിരിക്കുന്നതും പുറത്ത് വിടാത്തതും അതുകൊണ്ടാണെന്നും മസ്ക് പോസ്റ്റിലൂടെ ആരോപിച്ചിരുന്നു. 'ബിഗ് ബോംബ്' എന്ന് വിശേഷിപ്പിച്ചാണ് മസ്ക് ഈ പോസ്റ്റ് എക്സില് പങ്കുവെച്ചത്.
'വലിയൊരു ബോംബ് പൊട്ടിക്കാനുള്ള സമയമായി. എപ്സ്റ്റീന് ഫയലില് ഡോണള്ഡ് ട്രംപ് ഉള്പ്പെട്ടിട്ടുണ്ട്. അതുകൊണ്ട് മാത്രമാണ് പൊതു ഇടത്തിലേക്ക് ആ ഫയലുകള് എത്താത്തത്. ശുഭദിനം...' എന്നായിരുന്നു മസ്കിന്റെ പോസ്റ്റ്. 'ഈ പോസ്റ്റ് കുറിച്ച് വെച്ചോളൂ, ഭാവിയില് സത്യം പുറത്തുവരിക തന്നെചെയ്യും' എന്ന് മറ്റൊരു പോസ്റ്റില് മസ്ക് കുറിച്ചു. പോസ്റ്റുകള് വലിയ ചര്ച്ചയായതോടെ എക്സില് നിന്നും ഇപ്പോള് ഇവ നീക്കം ചെയ്തിരിക്കുകയാണ് മസ്ക്.
''മസ്കും ഞാനും തമ്മിലുണ്ടായിരുന്നത് വളരെനല്ല ബന്ധമാണ്. ഇനി അതുണ്ടാകുമോ എന്ന് എനിക്കറിയില്ല. ഇവിടെയിരിക്കുന്ന മറ്റാരെക്കാളും ബജറ്റ് ബില്ലിന്റെ ഉള്ളടക്കവും പിന്നിലെ പ്രവര്ത്തനവും മസ്കിനറിയാം. പെട്ടെന്ന് അദ്ദേഹത്തിന് അത് പ്രശ്നമായിത്തീര്ന്നു,'' -എന്നാണ് ഇതിനോട് ട്രംപിന്റെ പ്രതികരണം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
