കരിയറിലെ തന്റെ ഏറ്റവും നിരാശാജനകമായ മത്സരം വെളിപ്പെടുത്തി പാക് മുന്‍ പേസര്‍ ഷുഐബ് അക്തര്‍. 2003 ലോകകപ്പിലെ ഇന്ത്യയ്‌ക്കെതിരായ മത്സരമാണ് അതെന്ന് അക്തര്‍ പറയുന്നു. അന്നത്തെ, ഇന്ത്യയ്‌ക്കെതിരായ മത്സരത്തിന്റെ തലേന്ന് രാത്രി കാലില്‍ അഞ്ച് ഇഞ്ചക്ഷനോളം എടുക്കേണ്ടി വന്നുവെന്നും അക്തര്‍ പറയുന്നു.
2003, മാര്‍ച്ച് ഒന്നിന് ഗ്രൂപ്പ് ഘട്ട മത്സരത്തില്‍ സച്ചിന്റെ 98 റണ്‍സിന്റെ മികവില്‍ ഇന്ത്യ ജയിച്ചു കയറുകയായിരുന്നു. 274 റണ്‍സാണ് ഇന്ത്യയ്ക്ക് മുന്‍പില്‍ അന്ന് പാകിസ്ഥാന്‍ വിജയ ലക്ഷ്യം വെച്ചത്. എന്നാല്‍ നാല് ഓവര്‍ ബാക്കി നില്‍ക്കെ ഇന്ത്യ ലക്ഷ്യം പിടിച്ചു.
മികച്ച ബൗളിങ് ലൈനപ്പ് ഞങ്ങള്‍ക്കുണ്ടായി. എന്നിട്ടും 274 റണ്‍സ് പ്രതിരോധിക്കാന്‍ സാധിച്ചില്ല. പാകിസ്ഥാന്റെ ഇന്നിങ്‌സിന് ശേഷം ഞാന്‍ സഹതാരങ്ങളോട് പറഞ്ഞു, 30-40 റണ്‍സ് കുറവാണ് നമ്മള്‍ എടുത്തിരിക്കുന്നത് എന്ന്. അത് കേട്ടതും സഹതാരങ്ങള്‍ എന്നോട് കയര്‍ത്തു...273 റണ്‍സ് പോരെങ്കില്‍ പിന്നെ എത്രയാണ് വേണ്ടത് എന്നാണ് അവര്‍ ചോദിച്ചതെന്ന് അക്തര്‍ പറയുന്നു.
ഇന്ത്യയെ ഓള്‍ഔട്ടാക്കാന്‍ സാധിക്കുമെന്നാണ് സഹതാരങ്ങള്‍ പറഞ്ഞത്. എന്നാല്‍, എനിക്കറിയാമായിരുന്നു, ബാറ്റിങ്ങിനെ തുണയ്ക്കുന്ന പിച്ചാണ് അതെന്നും, രണ്ടാമത് ബാറ്റ് ചെയ്യുന്ന ടീമിനും പിച്ചില്‍ നിന്ന് ആ ആനുകൂല്യം ലഭിക്കുമെന്നും. പാകിസ്ഥാന്റെ ഫീല്‍ഡിങ് തുടങ്ങിയപ്പോഴാണ് ഞാന്‍ മനസിലാക്കുന്നത് എന്റെ കാല്‍മുട്ട് മരവിച്ചിരിക്കുന്നു എന്ന്.
കാല്‍മുട്ട് മരവിച്ചിരിക്കുന്നതിനാല്‍ എന്റെ ബൗളിങ് റണ്‍അപ്പ് ശരിയാവുന്നുണ്ടായില്ല. അതുകൊണ്ട് തന്നെ ശരിയായി ബൗള്‍ ചെയ്യാനും എനിക്ക് സാധിച്ചില്ല. തുടക്കം മുതല്‍ സച്ചിനും സെവാഗും ചേര്‍ന്ന് ആക്രമിച്ച് കളിക്കുകയായിരുന്നു. എന്റെ ഡെലിവറിയില്‍ സിക്‌സ് വരെ പറത്തി...ഈ സമയം എങ്ങനെ ബൗള്‍ ചെയ്യണം, ബ്രേക്ക്ത്രൂ ടീമിന് നേടിക്കൊടുക്കണം എന്ന് ഒരു രൂപവുമുണ്ടായില്ല.
ആക്രമണത്തില്‍ നിന്നും എന്നെ വഖാര്‍ യൂനിസ് മാറ്റി. എന്നാല്‍ പിന്നെ വന്ന എന്റെ സ്‌പെല്ലില്‍ സച്ചിനെ വീഴ്ത്താനായി. എന്റെ ഷോര്‍ട്ട് പിച്ച്ഡ് ഡെലിവറിയിലാണ് സച്ചിന്‍ വീണത്. അപ്പോള്‍ ഞാന്‍ നായകനോട് പറഞ്ഞു, തുടക്കം മുതല്‍ ഞാന്‍ ഇങ്ങനെയായിരുന്നു പന്തെറിയേണ്ടിയിരുന്നത്..,,
72 റണ്‍സാണ് അക്തര്‍ അന്ന് വഴങ്ങിയത്. 1999ലും 2003ലും ഞങ്ങള്‍ക്ക് ഇന്ത്യയെ തോല്‍പ്പിക്കാമായിരുന്നു. എന്നാല്‍ കഴിഞ്ഞില്ല. അതാണ് ഏറെ നിരാശപ്പെടുത്തുന്നത്. ഇപ്പോഴും ആ തോല്‍വിയില്‍ എനിക്ക് കുറ്റബോധമുണ്ട്. എന്റെ ഫിറ്റ്‌നസിലെ പ്രശ്‌നവും, മോശം ക്യാപ്റ്റന്‍സിയും അവിടെ ഞങ്ങളെ തോല്‍പ്പിച്ചു...അക്തര്‍ പറയുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
