ചരിത്രമെഴുതി ഇന്ത്യൻ വംശജനായ 12കാരൻ; ലോകത്തിലെ ഏറ്റവും പ്രായം കുറഞ്ഞ ചെസ് ​ഗ്രാൻഡ് മാസ്റ്റർ; തകർത്തത് 19 വർഷം പഴക്കമുള്ള റെക്കോർഡ്

ബുഡാപെസ്റ്റ്: ലോകത്തിലെ ഏറ്റവും പ്രായം കുറഞ്ഞ ചെസ് ഗ്രാൻഡ് മാസ്റ്ററെന്ന പെരുമ ഇനി ഇന്ത്യൻ വംശജനായ 12കാരന്. അമേരിക്കയിലെ ന്യൂജേഴ്സിയിൽ താമസിക്കുന്ന ഇന്ത്യൻ വംശജനായ അഭിമന്യു മിശ്രയാണ് നേട്ടം സ്വന്തമാക്കിയത്. 

ഹംഗറിയിലെ ബുഡാപെസ്റ്റിൽ നടന്ന ചെസ് ടൂർണമെന്റിലാണ് 12 വയസുകാരന്റെ നേട്ടം. 15-കാരനായ ഗ്രാൻഡ് മാസ്റ്റർ ലിയോൺ ലൂക്ക് മെൻഡോൺക്കെയെയാണ് അഭിമന്യു പരാജയപ്പെടുത്തിയത്. അഭിമന്യുവിന്റെ പ്രായം 12 വയസും നാല് മാസവും 25 ദിവസവുമാണ്.

19 വർഷമായി ഈ റെക്കോർഡ് സെർജി കർജാകിൻസിന്റെ പേരിലായിരുന്നു. 2002 ഓഗസ്റ്റ് 12-നായിരുന്നു സെർജി കർജാകിൻ ലോകത്തെ ഏറ്റവും പ്രായം കുറഞ്ഞ ഗ്രാൻഡ് മാസ്റ്റർ എന്ന റെക്കോഡ് സ്വന്തമാക്കിയത്. അന്ന് 12 വയസും ഏഴ് മാസവുമായിരുന്നു സെർജിയുടെ പ്രായം.