ലോങ്ജംപില്‍ ചരിത്രം കുറിച്ച് ആന്‍സി സോജന്‍; അഞ്ജുവിന്റെ റെക്കോര്‍ഡ് പഴങ്കഥ

6.88 മീറ്റര്‍ ചാടി ലോങ് ജംപിൽ ചരിത്രം കുറിച്ച് ആന്‍സി സോജന് ദേശീയ റെക്കോര്‍ഡ്. 2004ൽ ഒളിംപിക്സിൽ അഞ്ജു ബോബി ജോർജ് ചാടിയ 6.83 മീറ്റർ ദൂ​രമാണ് തകർത്തത്. ഇതോടെ 22 വർഷം പഴക്കമുള്ള അഞ്ജു ബോബി ജോർജിന്റെ റെക്കോർഡ് പഴങ്കഥയായി. ഭുവനേശ്വറിൽ നടക്കുന്ന ദേശീയ ഇന്റർ സ്റ്റേറ്റ് സീനിയർ അത്‌ലറ്റിക്സ് ചാമ്പ്യൻഷിപ്പിലാണ് മലയാളി താരം ആൻസി സോജന്റെ ചരിത്ര നേട്ടം.

തന്‍റെ റെക്കോര്‍ഡ് മറികടന്നതില്‍ സന്തോഷമെന്ന് അഞ്ജു ബോബി ജോര്‍ജ് പ്രതികരിച്ചു.അത് മലയാളിയായതിൽ ഏറെ സന്തോഷമെന്നും അഞ്ജു പറഞ്ഞു. അഞ്ചാം ശ്രമത്തിലാണ് 6.88 മീറ്റർ ചാടി താരം പുതിയ ദേശീയ റെക്കോർഡ് കുറിച്ചത്.തുടക്കം മുതലേ മികച്ച പ്രകടനമാണ് ആൻസി പുറത്തെടുത്തത്. ഈ നേട്ടത്തോടെ ദേശീയ ചാമ്പ്യൻഷിപ്പിലെ സ്വർണ്ണവും താരം സ്വന്തമാക്കി.

ഏഷ്യൻ അത്‌ലറ്റിക്സ് ചരിത്രത്തിലെ ഏറ്റവും മികച്ച എട്ടാമത്തെ ദൂരമാണിത്.കൂടാതെ കഴിഞ്ഞ രണ്ട് പതിറ്റാണ്ടിനിടെ 6.85 മീറ്റർ ദൂരം പിന്നിടുന്ന രണ്ടാമത്തെ ഏഷ്യൻ വനിത എന്ന വലിയ നേട്ടവും ആൻസി സ്വന്തമാക്കി. വരാനിരിക്കുന്ന ഏഷ്യൻ ഗെയിംസിനുള്ള അത്‌ലറ്റിക്സ് ഫെഡറേഷൻ ഓഫ് ഇന്ത്യയുടെ യോഗ്യതാ മാർക്കും താരം പിന്നിട്ടു.