'ഇത് രണതും​ഗ അല്ലേ, അദ്ദേഹത്തിന് എന്തുപറ്റി?'... മുൻ ലങ്കൻ നായകന്റെ അമ്പരപ്പിക്കുന്ന മാറ്റം

കൊളംബോ: ശ്രീലങ്കയെ ചരിത്രത്തിലാദ്യമായി ഏകദിന ലോകകപ്പ് കിരീടത്തിലേക്ക് നയിച്ച ക്യാപ്റ്റൻ അർജുന രണതും​ഗയുടെ പുതിയ രൂപമാറ്റം കണ്ട് അമ്പരന്ന് ആരാധകർ. അടുത്തിടെ നടന്ന തമിഴ് യൂണിയന്റെ 125ാം വർഷികത്തിനെത്തിയ രണതും​ഗയെ കണ്ടാണ് ആരാധകരുടെ അമ്പരപ്പ്. മുൻ സഹ താരങ്ങളായ സനത് ജയസൂര്യ, അരവിന്ദ ഡിസിൽവ, മുത്തയ്യ മുരളീധരൻ എന്നിവർക്കൊപ്പമാണ് അദ്ദേഹം ചടങ്ങിനെത്തിയത്.

ചുവന്ന കുർത്ത ധരിച്ചെത്തിയ രണതും​ഗയുടെ ജയസൂര്യ, ഡിസിൽവ, മുത്തയ്യ എന്നിവർക്കൊപ്പം നിൽക്കുന്ന ചിത്രമാണ് വൈറലായത്. എന്നാൽ രണതും​ഗയെ പലർക്കും പെട്ടെന്നു തിരിച്ചറിയാൻ സാധിച്ചില്ല. അമ്പരപ്പിക്കുന്ന ട്രാൻസ്ഫോർമേഷനാണ് അദ്ദേഹത്തിന്റേത്.

ക്രിക്കറ്റ് സജീവമായ കാലത്തെ അപേക്ഷിച്ചു വളരെ മെലിഞ്ഞാണ് അദ്ദേഹം പൊതുവേദിയിൽ എത്തിയത്. സനത് ജയസൂര്യ പങ്കിട്ട ഫോട്ടോയാണ് വൈറലായത്. പിന്നാലെ താരത്തെ കുറിച്ചുള്ള ആരാധകരുടെ അന്വേഷണങ്ങളും തുടങ്ങി. അദ്ദേഹത്തിന്റെ ആരോ​ഗ്യ സ്ഥിതിയെക്കുറിച്ചുള്ള ആശങ്കകളും അതിനിടെ പ്രചരിച്ചു.

'ആ ചുവന്ന കുർത്തയിലുള്ളത് അർജുന സാർ ആണോ', 'അദ്ദേഹത്തിനു എന്തുപറ്റി'... 'രണതും​ഗയെ തിരിച്ചറിയാൻ സാധിക്കുന്നില്ല'... 'അർജുന എല്ലാവരേക്കാളും 20 വയസ് ചെറുപ്പമായി'. തുടങ്ങിയ കമന്റുകളാണ് ചിത്രത്തിനു താഴെ വരുന്നത്.

1996ലെ ലോകകപ്പിൽ രണതും​ഗയുടെ ക്യാപ്റ്റൻസിയിൽ കളിച്ച ലങ്ക ഫൈനലിൽ ഓസ്ട്രേലിയയെ ഏഴ് വിക്കറ്റിനു വീഴ്ത്തിയാണ് കിരീടത്തിൽ മുത്തമിട്ടത്. 2000ത്തിൽ ദക്ഷിണാഫ്രിക്കയ്ക്കെതിരെ ടെസ്റ്റ് പരമ്പരയ്ക്കു പിന്നാലെ അദ്ദേഹം രാജ്യാന്തര ക്രിക്കറ്റിൽ നിന്നു വിരമിച്ചു. പിന്നീട് രണതും​ഗ രാഷ്ട്രീയത്തിൽ ഇറങ്ങി. സിംഹള ഉറുമയ പാർട്ടിയിൽ അം​ഗമായിരുന്നു അദ്ദേഹം.