ബ്രിസ്‌ബെയ്ന്‍: ഓസ്‌ട്രേലിയന്‍ വനിതാ ടീമിനെതിരായ ഒന്നാം ഏകദിന പോരാട്ടത്തില്‍ ഇന്ത്യന്‍ വനിതകള്‍ക്ക് ദയനീയ തോല്‍വി. ആദ്യം ബാറ്റ് ചെയ്ത ഇന്ത്യ വെറും 100 റണ്‍സില്‍ പുറത്തായി. ടി20 ലാഘവത്തില്‍ ബാറ്റേന്തിയ ഓസീസ് വനിതകള്‍ 16.2 ഓവറില്‍ 5 വിക്കറ്റ് മാത്രം നഷ്ടത്തില്‍ 102 റണ്‍സെടുത്തു വിജയിച്ചു. 5 വിക്കറ്റിനാണ് ഓസ്‌ട്രേലിയ വിജയിച്ചത്.
അനായാസ ലക്ഷ്യത്തിലേക്ക് ബാറ്റേന്തിയ ഓസീസിനായി ഓപ്പണര്‍ ജോര്‍ജിയ വോള്‍ തിളങ്ങി. താരം 42 പന്തില്‍ 46 റണ്‍സെടുത്തു പുറത്താകാതെ നിന്നു. സഹ ഓപ്പണര്‍ ഫോബ് ലിച്ഫീല്‍ഡ് 29 പന്തില്‍ 35 റണ്‍സെടുത്തു.
48 റണ്‍സില്‍ ആദ്യ വിക്കറ്റ് വീണ ഓസീസിനു പിന്നീടു തുടരെ വിക്കറ്റുകള്‍ നഷ്ടമായെങ്കിലും ഒരറ്റത്ത് പൊരുതി നിന്ന ജോര്‍ജിയയുടെ മികവ് കൂടുതല്‍ നഷ്ടങ്ങളില്ലാതെ ടീമിനു ജയം സമ്മാനിച്ചു.
ഇന്ത്യക്കായി രേണുക സിങ് മൂന്ന് വിക്കറ്റുകള്‍ വീഴ്ത്തി. പ്രിയ മിശ്ര രമ്ട് വിക്കറ്റെടുത്തു.
നേരത്തെ ആദ്യം ബാറ്റ് ചെയ്ത ഇന്ത്യക്കായി നാല് താരങ്ങള്‍ മാത്രമാണ് രണ്ടക്കം കടന്നത്. 23 റണ്‍സെടുത്ത ജെമിമ റോഡ്രിഗസാണ് ടോപ് സ്‌കോറര്‍. ഹര്‍ലീന്‍ ഡിയോള്‍ (19), ക്യാപ്റ്റന്‍ ഹര്‍മന്‍പ്രീത് കൗര്‍ (17), റിച്ച ഘോഷ് (14) എന്നിവരാണ് രണ്ടക്കം കടന്നത്.
5 വിക്കറ്റുകള്‍ വീഴ്ത്തിയ മെഗന്‍ ഷുറ്റിന്റെ മിന്നും ബൗളിങാണ് ഇന്ത്യയെ 100 റണ്‍സില്‍ ഒതുക്കിയത്. കിം ഗാര്‍ത്, അഷ്‌ലി ഗാര്‍ഡ്‌നര്‍, അന്നബെല്‍ സതര്‍ലാന്‍ഡ്, അലന കിങ് എന്നിവര്‍ ഓരോ വിക്കറ്റെടുത്തു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
