ന്യൂഡല്ഹി: ബാഡ്മിന്റണ് ലോക ചാംപ്യന്ഷിപ്പിലെ വനിതാ ഡബിള്സില് ഇന്ത്യയുടെ ട്രീസ ജോളി-ഗായത്രി ഗോപിചന്ദ് സഖ്യം പ്രീ-ക്വാര്ട്ടറിലേക്ക് മുന്നേറി. അമേരിക്കന് ജോഡിയായ ലോറന് ലാം-അലിസണ് ലീ സഖ്യത്തെ നേരിട്ടുള്ള ഗെയിമുകള്ക്ക് (21-15, 21-12) പരാജയപ്പെടുത്തിയാണ് ഇന്ത്യന് സഖ്യം തങ്ങളുടെ കരുത്ത് തെളിയിച്ചത്. 38 മിനിറ്റ് മാത്രം നീണ്ടുനിന്ന മത്സരത്തില് ആക്രമണോത്സുകമായ പോരാട്ടമാണ് ഇരുവരും പുറത്തെടുത്തത്.
പുരുഷന്മാരുടെ സിംഗിള്സില് ലക്ഷ്യ സെന് രണ്ടാം റൗണ്ടിലേക്ക് കടന്നു. ഓസ്ട്രിയയുടെ കോളിന്സ് വാലന്റൈന് ഫിലിമോണിനെതിരെയായിരുന്നു സെന്നിന്റെ വിജയം. ആദ്യ ഗെയിം നഷ്ടമായെങ്കിലും മികച്ച തിരിച്ചുവരവ് നടത്തിയ സെന്, 16-21, 21-8, 21-4 എന്ന സ്കോറിനാണ് വിജയം സ്വന്തമാക്കിയത്. 45 മിനിറ്റ് നീണ്ടുനിന്ന പോരാട്ടത്തിനൊടുവിലാണ് താരം അടുത്ത റൗണ്ടിലേക്കുള്ള ടിക്കറ്റ് ഉറപ്പിച്ചത്. ആദ്യ ഗെയിമില് താളം കണ്ടെത്താന് പ്രയാസപ്പെട്ടെങ്കിലും, തുടര്ന്നുള്ള ഗെയിമുകളില് ആക്രമണോത്സുകമായ പ്രകടനമാണ് സെന് കാഴ്ചവെച്ചത്.
വനിതാ സിംഗിള്സില് ഉന്നതി ഹൂഡ മ്യാന്മറിന്റെ തെറ്റ് ഹ്താര് തുസാറിനെ പരാജയപ്പെടുത്തി അടുത്ത റൗണ്ടിലേക്ക് കടന്നു (സ്കോര്: 22-20, 21-16). എന്നാല്, വനിതാ ഡബിള്സില് മറ്റൊരു ഇന്ത്യന് ജോഡിയായ കവിപ്രിയ ശെല്വം-സിമ്രാന് സിംഗി സഖ്യം ബള്ഗേറിയന് താരങ്ങളോട് പരാജയപ്പെട്ട് പുറത്തായി. മിക്സഡ് ഡബിള്സിലും ഇന്ത്യന് താരങ്ങള്ക്ക് തിരിച്ചടികള് നേരിട്ടു. ആഷിത് സൂര്യ-അമൃത പ്രമുതേഷ് സഖ്യവും റുത്വിക ഗാഡെ-രോഹന് കപൂര് സഖ്യവും ടൂര്ണമെന്റില് നിന്ന് പുറത്തായി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
