സൗരവ് ​ഗാം​ഗുലിയുടെ ആരോ​ഗ്യനില മെച്ചപ്പെട്ടു; മുറിയിലേക്ക് മാറ്റി 

കൊൽക്കത്ത: ബിസിസിഐ പ്രസിഡന്റ് സൗരവ് ​ഗാം​ഗുലിയെ മുറിയിലേക്ക് മാറ്റി. ആരോ​ഗ്യനില മെച്ചപ്പെട്ടതിനെത്തുടർന്ന് തീവ്രപരിചരണ വിഭാ​ഗത്തിൽ നിന്ന് അദ്ദേഹത്തെ ഇന്ന് മുറിയിലേക്ക് മാറ്റിയതായി ആശുപത്രി വൃത്തങ്ങൾ അറിയിച്ചു. കൊൽക്കത്തയിലെ അപ്പോളോ ആശുപത്രിയിൽ ചികിത്സയിൽ തുടരുകയാണ് അദ്ദേഹം. 

വ്യാഴാഴ്ച നെഞ്ചുവേദനയെ തുടർന്നാണ് അദ്ദേഹത്തെ ആശുപത്രിയിൽ പ്രവേശിപ്പിച്ചത്. രണ്ടാം തവണയും ​ഗാം​ഗുലിയെ ആൻജിയോപ്ലാസ്റ്റിക്ക് വിധേയനാക്കിയെന്ന് ഡോക്ടർമാർ അറിയിച്ചു. നിലവിൽ അദ്ദേഹത്തിന്റെ ആരോ​ഗ്യനില ഭേദപ്പെട്ടെന്നും നിരീക്ഷണത്തിൽ തുടരുകയാണെന്നും മെഡിക്കൽ ബുള്ളറ്റിനിൽ അറിയിച്ചു. 

ജനുവരി രണ്ടിന് നെഞ്ചുവേദനയെ തുടർന്ന് ​ഗാ​​ഗുലിയെ ആശുപത്രിയിൽ പ്രവേശിപ്പിക്കുകയും ആൻജിയോപ്ലാസ്റ്റിക്ക് വിധേയമാക്കുകയും ചെയ്തിരുന്നു.ഹൃദയധമനിയിലെ മൂന്ന് ബ്ലോക്കുകൾ കണ്ടെത്തിയതിൽ ഒരെണ്ണം നീക്കി. കൊൽക്കത്ത വുഡ്‌ലാൻഡ് ഹോസ്പിറ്റലിലായിരുന്നു അന്ന് ചികിത്സ.