3 ഓവർ 2 മെയ്ഡൻ 4 റൺസ് 9 വിക്കറ്റ്; 5 പന്തിൽ തുടരെ മടക്കിയത് 5 പേരെ! ചരിത്രമെഴുതി ലോറ കാർഡോസോ (വിഡിയോ)

​ഗാബോറൻ: അന്താരാഷ്ട്ര ടി20 പോരാട്ടത്തിൽ ചരിത്രമെഴുതി ബ്രസീൽ വനിതാ ക്രിക്കറ്റ് താരം ലോറ കാർഡോസോ. മീഡിയം പേസറായ താരം ടി20 ക്രിക്കറ്റ് ചരിത്രത്തിലെ തന്നെ (പുരുഷ, വനിത) ഏറ്റവും മികച്ച ബൗളിങ് ഫി​ഗറിന്റെ ലോക റെക്കോർഡ് താരം സ്വന്തം പേരിലാക്കി. 18 പന്തുകൾക്കിടെ താര വീഴ്ത്തിയത് 9 വിക്കറ്റുകൾ.

ലെസോതോ എന്ന കുഞ്ഞൻ രാജ്യത്തിനെതിരെയാണ് ബ്രസീൽ താരത്തിന്റെ അമ്പരപ്പിക്കുന്ന ബൗളിങ്. 3 ഓവറിൽ 2 മെയ്ഡൻ ഉൾപ്പെടെ 4 റൺസ് മാത്രം വഴങ്ങിയാണ് താരം 9 വിക്കറ്റുകൾ പിഴുതത്. അതിൽ തന്നെ തുടരെ 5 പന്തുകളിൽ താരം 5 വിക്കറ്റുകൾ വീഴ്ത്തി. തന്റെ ആദ്യ ഓവറിലെ അവസാന മൂന്ന് പന്തിൽ റൺസൊന്നും വഴങ്ങാതെ 3 വിക്കറ്റെടുത്ത് ഹാട്രിക്ക് തികച്ച ലോറ തന്റെ രണ്ടാം ഓവറില ആദ്യ രണ്ട് പന്തിലും വിക്കറ്റെടുത്ത് തുടരെ 5 പന്തുകളിൽ വിക്കറ്റുകൾ സ്വന്തമാക്കി. ഈ ഓവറിലും താരം ഒരു റൺസ് പോലും വഴങ്ങാതെ വീഴ്ത്തിയത് 4 വിക്കറ്റുകൾ. തന്റെ മൂന്നാം ഓവറിലാണ് താരം 4 റൺസ് വഴങ്ങിയത്. അതിൽ തന്നെ 3 പന്തുകൾ വൈഡായിരുന്നു. ഈ ഓവറിലും 2 വിക്കറ്റുകൾ താരം വീഴ്ത്തി.

മത്സരത്തിൽ ആദ്യം ബാറ്റ് ചെയ്ത ബ്രസീൽ 202 റൺസെന്ന കൂറ്റൻ സ്കോറായിരുന്നു ഉയർത്തിയത്. എന്നാൽ ലോറ 9 വിക്കറ്റുകൾ 18 പന്തുകൾക്കിടെ പിഴുതതോടെ ലെസോതോയുടെ ബാറ്റിങ് ചീട്ടുകൊട്ടാരം കണക്കെ നിലംപൊത്തി. വെറും 13 റൺസിൽ. ബ്രസീലിന് 189 റൺസിന്റെ പടുകൂറ്റൻ ജയം.

പുരുഷ, വനിതാ വിഭാ​ഗങ്ങളിലായി ടി20യുടെ ചരിത്രത്തിൽ 9 വിക്കറ്റുകൾ വീഴ്ത്തുന്ന ആദ്യ ബൗളറാണ് 21കാരിയായ ലോറ. കഴി‍ഞ്ഞ വർഷം മ്യാൻമറിനെതിരെ ഭൂട്ടാൻ താരം സോനം യെഷി നേടിയ 7 റൺസ് വഴങ്ങി 8 വിക്കറ്റുകൾ എന്ന റെക്കോർഡാണ് ലോറ പഴങ്കഥയാക്കിയത്.