'കാമറോൺ ​ഗ്രീൻ കള്ളനാണ്, ചതിയൻ...ചതിയൻ...ചതിയൻ'- ​ഗിൽ ഔട്ടല്ലെന്ന് ആരാധകർ

ലണ്ടൻ: ലോക ടെസ്റ്റ് ചാമ്പ്യൻഷിപ്പിൽ മറ്റൊരു വിവാദം കൂടി. രണ്ടാം ഇന്നിങ്സിൽ ഇന്ത്യൻ ഓപ്പണർ ശുഭ്മാൻ ​ഗിൽ പുറത്തായതാണ് വിവാദങ്ങൾക്ക് ഇടയാക്കിയത്. താരത്തെ കാമറോൺ ​ഗ്രീൻ ക്യാച്ചെടുത്തു മടക്കുകയായിരുന്നു. എന്നാൽ ​ഗ്രീൻ പന്ത് പിടിച്ചപ്പോൾ അദ്ദേഹത്തിന്റെ കൈകൾ ​ഗ്രൗണ്ടിൽ ടച്ച് ചെയ്തെന്നാണ് ആരാധകർ ആരോപിക്കുന്നത്. 

സ്കോട്ട് ബോളണ്ട് എറിഞ്ഞ എട്ടാം ഓവറിൽ ആദ്യ പന്തിലാണ് ​ഗിൽ മടങ്ങിയത്. 18 റൺസാണ് താരം കണ്ടെത്തിയത്. ടിവി റിപ്ലേ പരിശോധിച്ച തേർഡ് അമ്പയർക്കു ക്യാച്ചിന്റെ ആധികാരികത ഉറപ്പിക്കാൻ സാധിച്ചില്ല. എന്നിട്ടും ​ഗിൽ ഔട്ടാണെന്ന് വിധിച്ചു. ഇതാണ് ആരാധകരെ ചൊടിപ്പിച്ചത്. 

കാമറോൺ ​ഗ്രീൻ ചതിയനാണെന്ന് ചില ആരാധകർ ആരോപിച്ചു. ചിലർ ​ഗ്രീനിനെ കള്ളൻ എന്നാണ് വിശേഷിപ്പിച്ചത്. ചായയുടെ ഇടവേളയിൽ ഡ​​​ഗൗട്ടിലേക്ക് ​ഗ്രീൻ നടന്നു വരുമ്പോൾ ചതിയൻ, ചതിയൻ എന്നു സ്റ്റേഡിയത്തിൽ നിന്നു ആരാധകർ ശബ്​ദമുയർത്തിയിരുന്നു. തെരുവു മുഴുവൻ വിളിച്ചു പറയുന്നു കാമറോൺ ​ഗ്രീൻ കള്ളനാണെന്ന് എന്നായിരുന്നു ചിലരുടെ കമന്റ്. 

444 റൺസ് ലക്ഷ്യത്തിലേക്ക് ബാറ്റേന്തുന്ന ഇന്ത്യ മൂന്ന് വിക്കറ്റ് നഷ്ടത്തിൽ 164 റൺസെന്ന നിലയിലാണ്. മത്സരത്തിന്റെ അവസാന ദിനമായ ഇന്ന് ഇന്ത്യക്ക് ജയിക്കാൻ 280 റൺസ് കൂടി വേണം. ഏഴ് വിക്കറ്റുകൾ ശേഷിക്കുന്നു. ഓസ്ട്രേലിയക്ക് ഈ ഏഴ് വിക്കറ്റുകൾ 280നു മുൻപ് വീഴ്ത്തുകയാണ് ലക്ഷ്യം. വിരാട് കോഹ്‌ലി (44), അജിൻക്യ രഹാനെ (20) എന്നിവരാണ് ക്രീസിൽ. 

ഈ വാർത്ത കൂടി വായിക്കൂ 

ക്രീസില്‍ കോഹ്‌ലിയും രഹാനെയും; വിജയത്തിനായി ഇന്ത്യ പൊരുതുന്നു

സമകാലിക മലയാളം ഇപ്പോൾ വാട്‌സ്ആപ്പിലും ലഭ്യമാണ്. ഏറ്റവും പുതിയ വാർത്തകൾക്കായി ക്ലിക്ക് ചെയ്യൂ