ലാഹോര്‍: ഇംഗ്ലണ്ടിനെ വീഴ്ത്തി അഫ്ഗാനിസ്ഥാന്‍ ചാംപ്യന്‍സ് ട്രോഫി പോരാട്ടത്തില്‍ നിര്‍ണായക വിജയം പിടിച്ചതോടെ ഗ്രൂപ്പ് ബി സമവാക്യങ്ങള്‍ മാറിയേക്കും. ഓസ്‌ട്രേലിയയും ദക്ഷിണാഫ്രിക്കയും തമ്മിലുള്ള പോരാട്ടം മഴ കൊണ്ടു പോയത് ഫലത്തില്‍ ഇരു ടീമുകള്‍ക്കും പാരയായി മാറിയേക്കും. അഫ്ഗാനിസ്ഥാന്‍ ഇംഗ്ലണ്ടിനെ പരാജയപ്പെടുത്തിയതോടെ ഓസീസ്, പ്രോട്ടീസ് ടീമുകള്‍ക്ക് സെമി ഉറപ്പിക്കാന്‍ അവസാന മത്സരം വരെ കാത്തിരിക്കേണ്ടി വരുമെന്ന സ്ഥിതിയാണ് നിലവില്‍.
ഇംഗ്ലണ്ടിന്റെ പുറത്താകല്‍ ഉറപ്പായി കഴിഞ്ഞു. അവസാന മത്സരത്തില്‍ അഫ്ഗാന് ഓസ്‌ട്രേലിയയുമായും ഇംഗ്ലണ്ട് ദക്ഷിണാഫ്രിക്കയുമായി ഏറ്റുമുട്ടും. ഓസ്‌ട്രേലിയ അഫ്ഗാനേയും ദക്ഷിണാഫ്രിക്ക ഇംഗ്ലണ്ടിനേയും വീഴ്ത്തിയാല്‍ ഇരു ടീമുകളും സെമിയിലേക്ക് കടക്കും.
അഫ്ഗാനിസ്ഥാന്‍- ഓസ്‌ട്രേലിയ
ഈ മത്സരത്തില്‍ അഫ്ഗാനിസ്ഥാന്‍ ജയിച്ചാല്‍ അവര്‍ സെമിയിലെത്തും. ഓസ്‌ട്രേലിയക്ക് 3 പോയിന്റും അഫ്ഗാന് 2 പോയിന്റുമാണ് നിലവില്‍. അഫ്ഗാനെ വീഴ്ത്തിയാല്‍ 5 പോയിന്റുമായി ഓസീസ് സെമി കാണും. അഫ്ഗാന് നാട്ടിലേക്ക് മടങ്ങും.
ഓസ്‌ട്രേലിയ- അഫ്ഗാന് പോരാട്ടം മഴയെ തുടര്‍ന്നു ഉപേക്ഷിച്ചാല്‍ ഓസ്‌ട്രേലിയക്കും അഫ്ഗാനും ഓരോ പോയിന്റ്. അപ്പോള്‍ ഓസ്‌ട്രേലിയക്ക് 4ഉം അഫ്ഗാന് 3ഉം പോയിന്റുകള്‍. ഓസ്‌ട്രേലിയ സെമിയിലേക്ക് മുന്നേറും. അഫ്ഗാന് ദക്ഷിണാഫ്രിക്ക- ഇംഗ്ലണ്ട് പോരാട്ടം കഴിയും വരെ കാക്കണം.
ഇംഗ്ലണ്ട്- ദക്ഷിണാഫ്രിക്ക
ഇംഗ്ലണ്ടിന്റെ സാധ്യതകള്‍ക്ക് ഈ മത്സര ഫലത്തില്‍ പ്രസക്തിയില്ല. ദക്ഷിണാഫ്രിക്ക ജയിച്ചാല്‍ അവര്‍ സെമി ഉറപ്പിക്കും. ഇംഗ്ലണ്ട് ജയിക്കുകയും അഫ്ഗാനിസ്ഥാന്‍ ഓസീസിനെ അട്ടിമറിക്കുകയും ചെയ്താല്‍ നെറ്റ് റണ്‍റേറ്റായിരിക്കും ഫലം നിര്‍ണയിക്കുക.
ഇംഗ്ലണ്ട് ജയിക്കുകയും ഓസ്‌ട്രേലിയ- അഫ്ഗാന് പോരാട്ടം മഴ കൊണ്ടു പോയാലും ദക്ഷിണാഫ്രിക്ക, അഫ്ഗാന് ടീമുകളുടെ സാധ്യതയും നെറ്റ് റണ്‍ റേറ്റ് കണക്കാക്കിയാവും.
ദക്ഷിണാഫ്രിക്കയും അഫ്ഗാനിസ്ഥാനും ജയിച്ചാല്‍ ഇരു ടീമുകളും സെമി ഉറപ്പിക്കും. ഓസ്‌ട്രേലിയ, ഇംഗ്ലണ്ട് ടീമുകള്‍ക്ക് മടങ്ങേണ്ടി വരും. ദക്ഷിണാഫ്രിക്ക- ഇംഗ്ലണ്ട് പോരില്‍ മഴ പെയ്യുകയും ഓസ്‌ട്രേലിയയെ അഫ്ഗാനിസ്ഥാന്‍ കീഴടക്കുകയും ചെയ്താല്‍ ദക്ഷിണാഫ്രിക്കയ്ക്കും ്ഫ്ഗാനും 4 പോയിന്റ് വീതം. ഇരു ടീമുകളും സെമിയിലെത്തും.
രണ്ട് മത്സരങ്ങളും ഒരു പന്തു പോലും എറിയാന്‍ കഴിയാതെ വന്നാല്‍ ഓസ്‌ട്രേലിയ, ദക്ഷിണാഫ്രിക്ക ടീമുകള്‍ക്ക് 4 പോയിന്റും അഫ്ഗാന് 3 പോയിന്റുമായിരിക്കും. ദക്ഷിണാഫ്രിക്ക, ഓസ്‌ട്രേലിയ ടീമുകള്‍ അവസാന നാലിലെത്തും.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
