'പുതിയ തലമുറയ്ക്കായി വഴിമാറുന്നു'; ശ്രീലങ്കൻ ടെസ്റ്റ് നായകസ്ഥാനം ഒഴിഞ്ഞ് ധനഞ്ജയ ഡിസിൽവ

കൊളംബോ: ശ്രീലങ്കൻ ടെസ്റ്റ് ടീം നായകസ്ഥാനം ഒഴിഞ്ഞതായി പ്രഖ്യാപിച്ച് ധനഞ്ജയ ഡിസിൽവ. പുതിയ തലമുറയിലേക്ക് നായകസ്ഥാനം കൈമാറാനുള്ള സമയമായെന്ന് ചൂണ്ടിക്കാട്ടിയാണ് 35-കാരനായ താരം വ്യാഴാഴ്ച അപ്രതീക്ഷിതമായി രാജി പ്രഖ്യാപിച്ചത്. തീരുമാനം ഉടനടി പ്രാബല്യത്തിൽ വരുമെങ്കിലും ഒരു കളിക്കാരൻ എന്ന നിലയിൽ ടീമിൽ തുടർന്നും ലഭ്യമായിരിക്കുമെന്ന് അദ്ദേഹം വ്യക്തമാക്കി. ശ്രീലങ്കൻ ക്രിക്കറ്റ് സെലക്ഷൻ കമ്മിറ്റിക്ക് അയച്ച കത്തിലാണ് താരം ഇക്കാര്യം അറിയിച്ചത്.

2024 ജനുവരിയിൽ ദിമുത് കരുണരത്നയിൽ നിന്നാണ് ധനഞ്ജയ ഡിസിൽവ ശ്രീലങ്കൻ ടെസ്റ്റ് ടീമിന്റെ നായകത്വം ഏറ്റെടുത്തത്. തുടർന്ന് 18 ടെസ്റ്റ് മത്സരങ്ങളിൽ ശ്രീലങ്കയെ നയിച്ച ഡിസിൽവയ്ക്ക് കീഴിൽ ഏഴ് മത്സരങ്ങളിൽ ടീം വിജയം സ്വന്തമാക്കി. നായകനായിരുന്ന കാലയളവിൽ 36.45 ശരാശരിയോടെ 1,130 റൺസും ഒൻപത് വിക്കറ്റുകളും അദ്ദേഹം നേടി. കരിയറിലാകെ 69 ടെസ്റ്റുകൾ കളിച്ചിട്ടുള്ള താരം 13 സെഞ്ചുറികൾ ഉൾപ്പെടെ 4,400-ലധികം റൺസ് നേടിയിട്ടുണ്ട്.

ടെസ്റ്റ് ക്രിക്കറ്റിന് നൽകിയ സമഗ്ര സംഭാവനകൾക്കും മികച്ച നേതൃത്വത്തിനും ശ്രീലങ്കൻ ക്രിക്കറ്റ് സിഇഒ ആഷ്‌ലി ഡിസിൽവ ധനഞ്ജയക്ക് നന്ദി അറിയിച്ചു. പുതിയ തലമുറയ്ക്ക് അവസരം നൽകാനായി സ്വയം പടിയിറങ്ങാനുള്ള അദ്ദേഹത്തിന്റെ തീരുമാനത്തെ ബഹുമാനിക്കുന്നുവെന്നും, വരും മത്സരങ്ങളിൽ ഒരു താരമായി ടീമിന് കൂടുതൽ കരുത്ത് പകരാൻ അദ്ദേഹത്തിന് സാധിക്കട്ടെയെന്നും ക്രിക്കറ്റ് ബോർഡ് ആശംസിച്ചു.