'റിവേഴ്സ് സ്വീപ് കളിക്ക് കാണട്ടെ'; ഡക്കറ്റിനെ 'തോണ്ടി' ജയ്സ്വാൾ, ​പ്രോത്സാഹിപ്പിച്ച് ​ഗില്ലും (വിഡിയോ)

ലണ്ടൻ: ഇന്ത്യ- ഇം​ഗ്ലണ്ട് താരങ്ങൾ തമ്മിൽ പരസ്പരം വാക്കുകൾ കൊണ്ടുള്ള ഏറ്റുമുട്ടൽ ടെസ്റ്റ് പരമ്പരയിലുടനീളമുണ്ടായിരുന്നു. നാലാം ​ദിനത്തിൽ ഇം​ഗ്ലീഷ് ഓപ്പണർ ബെൻ ഡക്കറ്റിനെ റിവേഴ്സ് സ്വീപ് കളിക്കാൻ പ്രേരിപ്പിക്കുന്ന യശസ്വി ജയ്സ്വാളും ആ പട്ടികയിലെത്തി. ജയ്സ്വാൾ ഡക്കറ്റിനോടു ഇക്കാര്യം പറയുമ്പോൾ ക്യാപ്റ്റൻ ശുഭ്മാൻ ​ഗില്ലിന്റെ പ്രോത്സാഹനവും ഉണ്ടായിരുന്നു.

ഡക്കറ്റ് തിരിച്ചു മറുപടി പറയുന്നുണ്ട്. ഇവരുടെ സംഭാഷണം സ്റ്റംപ് മൈക്ക് പിടിച്ചിട്ടുണ്ട്. ഇതിന്റെ വിഡിയോ വൈറലായി മാറുകയും ചെയ്തു. ഇന്ത്യൻ ബൗളർമാരെ ഡക്കറ്റ് കരുതലോടെ നേരിടുന്നതിനിടെയാണ് ജയ്സ്വാളിന്റെ കളിയാക്കൽ.

'കാണട്ടെ നിങ്ങളുടെ കുറച്ചു ഷോട്ടുകൾ. എനിക്ക് നല്ല ആ​ഗ്രഹമുണ്ട് അതൊക്കെ കാണാൻ. ഇതല്ല ശരിക്കും നിങ്ങളുടെ കളി. സ്വീപും റിവേഴ്സ് സ്വീപുമൊക്കെ കളിച്ചു നോക്കു'- എന്നായിരുന്നു ഇന്ത്യൻ ഓപ്പണർ പറഞ്ഞ്.

'നീ പറയുന്നതു ഞാനെന്തിനു കേൾക്കണം'- എന്നായിരുന്നു ഡക്കറ്റിന്റെ മറുപടി.

മത്സരത്തിൽ ഇം​ഗ്ലണ്ടിനായി ഡക്കറ്റ് അർധ സെഞ്ച്വറി നേടിയാണ് മടങ്ങിയത്. താരം 83 പന്തിൽ 54 റൺസെടുത്തു. 374 റൺസാണ് ഇന്ത്യ ഇം​ഗ്ലണ്ടിനു മുന്നിൽ ലക്ഷ്യം വച്ചത്. 35 റൺസ് കൂടി വേണം ആതിഥേയർക്ക് ജയിക്കാൻ. 4 വിക്കറ്റുകൾ അതിനു മുൻപ് വീഴ്ത്തിയാൽ ഇന്ത്യക്കും ജയിക്കാം.