അറ്റ്ലാന്റ: ഫിഫ ലോകകപ്പില് ഉസ്ബെക്കിസ്ഥാനെ ഒന്നിനെതിരെ മൂന്ന് ഗോളുകള്ക്ക് തകര്ത്ത് കോംഗോ ചരിത്രത്തിലാദ്യമായി ലോകകപ്പിന്റെ നോക്കൗട്ട് സ്റ്റേജിലേക്ക് യോഗ്യത നേടി. ചരിത്രത്തില് രണ്ടാം തവണ മാത്രമാണ് ഈ ആഫ്രിക്കന് രാജ്യം ലോകകപ്പ് കളിക്കുന്നത്.
രണ്ടാം പകുതിയില് യോവാന് വിസ്സ നേടിയ രണ്ട് ഗോളുകളും ഫിസ്റ്റണ് മയേലെയുടെ ഒരു ഗോളുമാണ് കോംഗോയ്ക്ക് വിജയം സമ്മാനിച്ചത്. ഇതോടെ കേപ് വെര്ദെയ്ക്ക് പിന്നാലെ റൗണ്ട് ഓഫ് 32-ലേക്ക് യോഗ്യത നേടുന്ന മറ്റൊരു അട്ടിമറി ടീമായി കോംഗോ മാറി.
ആദ്യ പകുതിയില് എല്ദോര് ഷൊമുറോദോവ് നേടിയ ഗോളില് ഉസ്ബെക്കിസ്ഥാന് മുന്നിലായിരുന്നു. ഇത് കോംഗോയുടെ പ്രതീക്ഷകള്ക്ക് മങ്ങലേല്പ്പിച്ചതായിരുന്നു. എന്നാല്, ആദ്യ മത്സരത്തില് ക്രിസ്റ്റ്യാനോ റൊണാള്ഡോയുടെ പോര്ച്ചുഗലിനെ 1-1 ന് സമനിലയില് തളച്ച് ലോകകപ്പിലെ വലിയ അട്ടിമറികളിലൊന്ന് സൃഷ്ടിച്ച സെബാസ്റ്റ്യന് ഡെസാബ്രെയുടെ ടീം രണ്ടാം പകുതിയില് ശക്തമായി തിരിച്ചുവന്നു.
68-ാം മിനിറ്റില് കോംഗോ സമനില പിടിച്ചു. ബോക്സിനുള്ളില് വിസ്സയെ അബ്ദുകോദിര് ഖുസനോവ് ഫൗള് ചെയ്തതിനാണ് കോംഗോയ്ക്ക് അനുകൂലമായി പെനാല്റ്റി ലഭിച്ചത്. പെനാല്റ്റിയെടുത്ത വിസ്സ ഉസ്ബെക്കിസ്ഥാന് ഗോള്കീപ്പര് അബ്ദുഹിദ് നെമറ്റോവിനെ പൂര്ണ്ണമായും കബളിപ്പിച്ച് പന്ത് വലയുടെ താഴത്തെ മൂലയിലേക്ക് പായിച്ചു.
പത്ത് മിനിറ്റുകള്ക്ക് ശേഷം, മെഷാക്ക് ഏലിയയുടെ ഷോട്ട് ഡിഫ്ലെക്ട് ചെയ്ത് വന്നപ്പോള് മയേലെ പന്ത് നെമറ്റോവിനെ മറികടന്ന് നിയര് പോസ്റ്റിലേക്ക് തിരിച്ചുവിട്ട് കോംഗോയെ മുന്നിലെത്തിച്ചു. തുടര്ന്ന് ഇഞ്ചുറി ടൈമില് വിസ്സ തന്റെ രണ്ടാമത്തെ ഗോളും നേടി കോംഗോയുടെ അവിസ്മരണീയ വിജയം പൂര്ത്തിയാക്കി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
