'സഞ്ജു ഇന്ന് തകർക്കും, ഉറപ്പാണ്, അതിന് ഒരു കാരണമുണ്ട്'; കൃഷ്ണമാചാരി ശ്രീകാന്ത്

ചെന്നൈ: ഐപിഎൽ മത്സരത്തിൽ ഇന്ന് ചെന്നൈ സൂപ്പർ കിങ്‌സ് പഞ്ചാബ് കിങ്സിനെ നേരിടാൻ ഒരുങ്ങുകയാണ്. വൈകിട്ട് 7.30ന് എം എ ചിദംബരം സ്റ്റേഡിയത്തിൽ നടക്കുന്ന മത്സരത്തിൽ ആരാധകർ ഉറ്റുനോക്കുന്നത് മലയാളി താരം സഞ്ജു സാംസന്റെ പ്രകടനമാണ്.

രാജസ്ഥാൻ റോയൽസിനെതിരായ കഴിഞ്ഞ മത്സരത്തിൽ താരത്തിന് വേണ്ട രീതിയിൽ തിളങ്ങാൻ കഴിഞ്ഞിരുന്നില്ല. എന്നാൽ ഈ മത്സരത്തിൽ സഞ്ജു മികച്ച പ്രകടനം പുറത്തെടുക്കുമെന്നാണ് മുൻ ഇന്ത്യൻ താരം കൃഷ്ണമാചാരി ശ്രീകാന്ത് പറയുന്നത്.

"മത്സരം നടക്കുന്നത് ചെപ്പോക്കിലാണ്. ടി20 വേൾഡ് കപ്പിൽ സഞ്ജു സാംസൺ മാൻ ഓഫ് ദ സീരീസ് നേടിയ അതേ വിക്കറ്റാണ് ഇത്. അവൻ ഇവിടെ മികച്ച രീതിയിൽ കളിക്കും എന്നുറപ്പാണ്. സഞ്ജുവിന് ഫോമിലേക്ക് തിരിച്ചുവരാൻ ഇതാണ് ഏറ്റവും അനുയോജ്യമായ വിക്കറ്റ്.

ആദ്യ നാല്-അഞ്ച് ബോളുകൾ സാധാരണ പോലെ നേരിട്ട ശേഷം സഞ്ജു മുഴുവൻ കഴിവും പുറത്തെടുത്ത് പഞ്ചാബിനെ അടിച്ചു തകർക്കും എന്നുറപ്പാണ്'' കൃഷ്ണമാചാരി ശ്രീകാന്ത് പറഞ്ഞു. അവസാന മത്സരത്തിൽ രാജസ്ഥാൻ റോയൽസിനെതിരായ മത്സരത്തിൽ സഞ്ജുവിന് 6 റൺസ് മാത്രമേ നേടാൻ കഴിഞ്ഞിരുന്നുള്ളൂ.

അതേസമയം, ചെന്നൈയ്ക്ക് ഈ മത്സരം നിർണായകമാണ്. ആദ്യ മത്സരത്തിൽ മോശം ബാറ്റിങ് പ്രകടനമാണ് ചെന്നൈ താരങ്ങളിൽ നിന്നുമുണ്ടായത്. ക്യാപ്റ്റന്‍ ഋതുരാജ് ഗെയ്ക്‌വാദിനൊപ്പം സഞ്ജു തന്നെ ഓപ്പണിങ് ചെയ്യാനായി ഇന്നും ഇറങ്ങും. സ്വന്തം കാണികൾക്ക് മുന്നിൽ വിജയിക്കാൻ കഴിയുമെന്നാണ് ടീമിന്റെ പ്രതീക്ഷ.