ക്രിക്കറ്റ് കളിക്കിടെ നെഞ്ചുവേദന; കര്‍ണാടക മുന്‍ രഞ്ജി താരം എസ്എല്‍ അക്ഷയ്ക്ക് ദാരുണാന്ത്യം

ബംഗളൂരു: കെഎസ്‍സിഎ പ്രാദേശിക ക്രിക്കറ്റ് പോരാട്ടം കളിക്കുന്നതിനിടെ മുന്‍ കര്‍ണാടക രഞ്ജി ട്രോഫി താരം എസ്എല്‍ അക്ഷയ്ക്ക് ദാരുണാന്ത്യം. ഹൃദയാഘാതമാണ് മരണ കാരണം. 39 വയസായിരുന്നു.

ബംഗളൂരു കെആര്‍ പുരത്തെ ഗ്രൗണ്ടില്‍ നടന്ന മൂന്നാം ഡിവിഷന്‍ പോരാട്ടത്തിനിടെയാണ് ദാരുണ സംഭവം. കളിക്കിടെ അക്ഷയ്ക്ക് നെഞ്ചുവേദന അനുഭവപ്പെടുകയായിരുന്നു. ഉടന്‍ തന്നെ അടുത്തുള്ള ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ സാധിച്ചില്ല.

കര്‍ണാടക രഞ്ജി ട്രോഫി ടീമില്‍ പേസ് ബൗളറായിരുന്നു അക്ഷയ്. കര്‍ണാടക പ്രീമിയര്‍ ലീഗിലും കളിച്ചിട്ടുണ്ട്.

ശിവമോഗ സ്വദേശിയായ അക്ഷയ് ജൂനിയര്‍ താരങ്ങളെ കണ്ടെത്തി വളര്‍ത്തിയെടുക്കുന്നതില്‍ മികവ് പുലര്‍ത്തുന്ന ഒരു പരിശീലകന്‍ കൂടിയാണ്. താരത്തിന്റെ മരണത്തില്‍ കര്‍ണാടക ക്രിക്കറ്റ് അസോസിയേഷന്‍ അനുശോചിച്ചു.