ന്യൂഡല്‍ഹി: ഗുവാഹത്തിയില്‍ വെസ്റ്റ് ഇന്‍ഡീസിനെതിരെ ഇന്ത്യ നടത്തിയ റെക്കോര്‍ഡ് റണ്‍വേട്ടയും പരമ്പര വിജയവും ആരാധകര്‍ക്ക് വിരുന്നായെങ്കിലും, മത്സരത്തിലെ പിച്ചിന്റെ നിലവാരത്തിനെതിരെ തുറന്നടിച്ച് ഇന്ത്യന്‍ മുഖ്യപരിശീലകന്‍ ഗൗതം ഗംഭീര്‍ രംഗത്ത്. ബൗളര്‍മാര്‍ക്ക് ഒരു ആനുകൂല്യവും നല്‍കാത്ത ഇത്തരം പിച്ചുകള്‍ ക്രിക്കറ്റിന്റെ സന്തുലിതാവസ്ഥ തകര്‍ക്കുമെന്നും 'ഇത് ക്രിക്കറ്റല്ല, വെറും ബാറ്റിങ് മാത്രമാണ്' എന്നും ഗംഭീര്‍ തുറന്നടിച്ചു.
ഗുവാഹത്തിയില്‍ നടന്ന രണ്ടാം ഏകദിനത്തില്‍ ആദ്യം ബാറ്റ് ചെയ്ത വെസ്റ്റ് ഇന്‍ഡീസ് 7 വിക്കറ്റ് നഷ്ടത്തില്‍ 405 റണ്‍സെന്ന കൂറ്റന്‍ സ്‌കോറാണ് പടുത്തുയര്‍ത്തിയത്. എന്നാല്‍ മറുപടി ബാറ്റിങ്ങിനിറങ്ങിയ ഇന്ത്യ 43.3 ഓവറില്‍ 2 വിക്കറ്റ് മാത്രം നഷ്ടപ്പെടുത്തി ലക്ഷ്യം മറികടന്നു. ശുഭ്മന്‍ ഗില്ലിന്റെ ഇരട്ട സെഞ്ചുറിയും (133 പന്തില്‍ 223*) രോഹിത് ശര്‍മയുടെ സെഞ്ചുറിയുമാണ് (75 പന്തില്‍ 101) ഇന്ത്യക്ക് ഏകദിന ചരിത്രത്തിലെ തങ്ങളുടെ ഏറ്റവും വലിയ റണ്‍വേട്ട സമ്മാനിച്ചത്. ഇതോടെ മൂന്ന് മത്സരങ്ങളടങ്ങിയ പരമ്പര ഇന്ത്യ 2-0 ന് സ്വന്തമാക്കുകയും ചെയ്തു.
മത്സരശേഷം സ്റ്റാര്‍ സ്‌പോര്‍ട്‌സിനോട് സംസാരിക്കവേ ഗംഭീര്‍ തന്റെ അമര്‍ഷം വ്യക്തമാക്കി. 'തുറന്നു പറഞ്ഞാല്‍, ബാറ്റും പന്തും തമ്മില്‍ കൃത്യമായൊരു പോരാട്ടം ഉറപ്പാക്കുന്ന പിച്ചുകളാണ് വേണ്ടത്. റണ്‍സ് ഒഴുകുന്നത് കാണാന്‍ നല്ലതാണെങ്കിലും ഇത് ക്രിക്കറ്റല്ല, വെറും ബാറ്റിങ് മാത്രമാണ്. 400 റണ്‍സ് വിട്ടുകൊടുത്ത ശേഷം അത് തിരിച്ചുചേസ് ചെയ്യുന്നത് റെക്കോര്‍ഡുകള്‍ക്കും കാണികള്‍ക്കും പ്രക്ഷേപകര്‍ക്കും മികച്ച അനുഭവമായിരിക്കും. എന്നാല്‍ ഒരു ക്രിക്കറ്റ് പ്രേമിയെന്ന നിലയിലും പരിശീലകനെന്ന നിലയിലും ബൗളര്‍മാരോട് എനിക്ക് സഹതാപം തോന്നുന്നുണ്ട്.'
ഏകദിന ക്രിക്കറ്റിലെ പുതിയ നിയമങ്ങളും പവര്‍പ്ലേ നിയന്ത്രണങ്ങളും ബൗളര്‍മാര്‍ക്ക് തിരിച്ചടിയാകുന്ന കാലത്ത് ഇത്തരത്തിലുള്ള പിച്ചുകള്‍ നല്‍കുന്നത് അനീതിയാണെന്നും അദ്ദേഹം കൂട്ടിച്ചേര്‍ത്തു. ഫീല്‍ഡിങ് നിയന്ത്രണങ്ങളും രണ്ട് ന്യൂബോളും അതിശക്തരായ ബാറ്റര്‍മാരും ഉള്ളപ്പോള്‍ ബൗളര്‍മാര്‍ക്ക് പിച്ചിന്റെ പിന്തുണയെങ്കിലും ലഭിക്കേണ്ടതുണ്ട്.
ഏകദിന ലോകകപ്പിനുള്ള തയ്യാറെടുപ്പുകളുടെ ഭാഗമായി യുവ ബൗളര്‍മാര്‍ക്ക് കടുത്ത സാഹചര്യങ്ങളില്‍ അവസരം നല്‍കുന്നതിനെക്കുറിച്ചും ഗംഭീര്‍ സംസാരിച്ചു. അരങ്ങേറ്റ മത്സരത്തില്‍ തന്നെ വല്ലാതെ റണ്‍സ് വഴങ്ങേണ്ടി വന്ന ആക്വിബ് നബി, ഗുര്‍നൂര്‍ ബ്രാര്‍ തുടങ്ങിയ യുവതാരങ്ങളെ ഇത്തരം പിച്ചുകളിലെ പ്രകടനം കണ്ട് മാത്രം വിലയിരുത്തരുതെന്ന് ഗംഭീര്‍ ഓര്‍മ്മിപ്പിച്ചു. പരമ്പര ഉറപ്പിച്ച സാഹചര്യത്തിലും സമ്മര്‍ദഘട്ടങ്ങളെ നേരിടാന്‍ യുവ ബൗളര്‍മാരെ പ്രാപ്തരാക്കുകയാണ് ലക്ഷ്യമെന്നും, എന്നാല്‍ ബൗളര്‍മാര്‍ക്ക് പന്തുകൊണ്ട് ഒന്നും ചെയ്യാനില്ലാത്ത പിച്ചുകള്‍ അവരുടെ വളര്‍ച്ചയെ ബാധിക്കുമെന്നും ഇന്ത്യന്‍ കോച്ച് വ്യക്തമാക്കി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
