പുകമറ മാറുമ്പോൾ സത്യം വ്യക്തമാകും; തരൂരിന്റെ പിന്തുണയ്ക്ക് നന്ദി പറഞ്ഞ് ഗൗതം ഗംഭീർ

നാഗ്പുര്‍: ശശി തരൂരിന്റെ പ്രശംസയ്ക്ക് നന്ദി പറഞ്ഞ് ഇന്ത്യൻ ക്രിക്കറ്റ് ടീം കോച്ച് ഗൗതം ഗംഭീർ. ''നന്ദി ശശി തരൂർ, പുക മറ മാറുമ്പോൾ ഒരു പരിശീലകന്റെ പരിമിതിയില്ലാത്ത അധികാരത്തെ പറ്റിയുള്ള സത്യവും യുക്തിയും വ്യക്തമാകും. അതുവരെ എന്റെ ഏറ്റവും മികച്ച കളിക്കാരുമായി മത്സരിക്കുന്നതിൽ ഞാൻ സന്തോഷം കണ്ടെത്തുന്നു'' എന്നാണ് എക്സ് അക്കൗണ്ടിലൂടെ ഗംഭീർ മറുപടി പറഞ്ഞത്.

പ്രധാനമന്ത്രി കഴിഞ്ഞാല്‍ ഏറ്റവും കടുപ്പമേറിയ ജോലി ചെയ്യുന്ന വ്യക്തിയാണ് ഗംഭീർ എന്നായിരുന്നു തരൂരിന്റെ പ്രശംസ. ദശലക്ഷക്കണക്കിന് ആളുകള്‍ ഓരോ ദിവസവും അദ്ദേഹത്തിന്റെ തീരുമാനങ്ങളെ സംശയിക്കുകയും ചോദ്യം ചെയ്യുകയോ ചെയ്യുന്നുണ്ട്. എന്നിട്ടും ഒട്ടും പതറാതെ ശാന്തനായി തന്റെ പാതയില്‍ മുന്നോട്ട് നീങ്ങുകയാണ് ഗംഭീര്‍ എന്നായിരുന്നു തരൂര്‍ സോഷ്യല്‍ മീഡിയയില്‍ കുറിച്ചത്.

ഇന്ത്യൻ ക്രിക്കറ്റ് ടീമിന്റെ മുഖ്യ പരിശീലകനായി ഗൗതം ഗംഭീർ ചുമതലയേറ്റ ശേഷം ടീമിന്റെ പ്രകടനങ്ങളിൽ സ്ഥിരത കണ്ടെത്താൻ കഴിഞ്ഞിട്ടില്ല. ടി20 ഫോർമാറ്റിൽ ഗംഭീറിന് കീഴിൽ ഇന്ത്യ പരാജയമറിയാതെ മുന്നോട്ട് പോകുന്നുണ്ടെങ്കിലും ടെസ്റ്റ്, ഏകദിന ഫോർമാറ്റുകളിൽ കനത്ത പരാജയമാണ് സ്വന്തം മണ്ണിൽ പോലും ഇന്ത്യൻ ടീമിന് ഉണ്ടായത്. ഇതിൽ വലിയ വിമർശനം ഗംഭീർ നേരിടേണ്ടി വന്നിട്ടുമുണ്ട്. ഇതാണ് 'പുക മറ' എന്നത് കൊണ്ട് ഗംഭീർ ഉദ്ദേശിച്ചത് എന്നാണ് ആരാധകർ പറയുന്നത്.