കളിക്കിടെ കുഴഞ്ഞു വീണു; ഘാന ഫുട്ബോൾ താരം റാഫേൽ ദ്വമെനയ്ക്ക് ദാരുണാന്ത്യം

ടിരാന: ഫുട്ബോൾ മത്സരത്തിനിടെ ഘാന ദേശീയ താരം ​ഗ്രൗണ്ടിൽ കുഴഞ്ഞു വീണു മരിച്ചു. റാഫേൽ ദ്വമെന (28) യാണ് മരിച്ചത്. അൽബേനിയൽ ലീ​ഗ് പോരാട്ടത്തിനിടെയാണ് താരത്തിന്റെ ദാരുണാന്ത്യം. ഒന്നാം ഡിവിഷൻ ലീ​ഗിൽ കെഎഫ് ഇ​ഗ്നാഷ്യയുടെ സ്ട്രൈക്കറാണ്. പാർടിസാനിക്കെതിരായ മത്സരത്തിനിടെയാണ് അന്ത്യം. ലീ​ഗിൽ ഒൻപത് ​ഗോളടിച്ച് ഒന്നാം സ്ഥാനക്കാരനായി നിൽക്കെയാണ് ദുരന്തം. 

കളിയുടെ 24ാം മിനിറ്റിലാണ് താരം കുഴഞ്ഞ് ​ഗ്രൗണ്ടിൽ വീണത്. ഇരു ടീമിലെ താരങ്ങളും റഫറിയും ടീം ഡോക്ടർമാരും ​ഗ്രൗണ്ടിലേക്ക് കുതിച്ചെത്തി. പ്രാഥമിക ചികിത്സ നൽകിയെങ്കിലും ജീവൻ രക്ഷിക്കാനായില്ല. ഹൃദ​യാഘാതമാണ് മരണ കാരണം.

2017ലും സമാന രീതിയിൽ താരം ​ഗ്രൗണ്ടിൽ കുഴഞ്ഞു വീണിരുന്നു. ഓസ്ട്രിയൻ കപ്പിനിടെയാണ് സംഭവം. അന്ന് താരത്തിനു ഹൃദ്രോ​ഗം സ്ഥിരീകരിച്ചു. ശസ്ത്രക്രിയക്ക് വിധേയനായി താരത്തിനു ഡിഫിബ്രിലേറ്റർ ഘടിപ്പിച്ചു. വീണ്ടും കളത്തിലേക്ക് തിരിച്ചെത്തി. ഇം​ഗ്ലീഷ് പ്രീമിയർ ലീ​ഗിൽ ബ്രൈറ്റനുമായി താരം കരാറിൽ എത്തിയിരുന്നു. എന്നാൽ ആരോ​ഗ്യ പ്രശ്നം ഇവിടെ വില്ലനായി. 

ഘാനയ്ക്കായി ഒൻപത് കളികൾ കളിച്ചു. സ്പാനിഷ് ലാ ലി​ഗയിൽ ലവാന്റെ, റയൽ സര​ഗോസ ടീമുകൾക്കായും താരം കളിച്ചിട്ടുണ്ട്. താരത്തിന്റെ മരണത്തെ തുടർന്നു മത്സരം ഉപേക്ഷിച്ചു. ലീ​ഗിലെ മറ്റു മത്സരങ്ങളും മാറ്റിയിട്ടുണ്ട്. 

ഈ വാർത്ത കൂടി വായിക്കൂ 

ശ്രേയസ് 128, രാഹുല്‍ 102; മൂന്ന് അര്‍ധ സെഞ്ച്വറികളും! ചിന്ന സ്വാമിയില്‍ 'ദീപാവലി വെടിക്കെട്ട്'

സമകാലിക മലയാളം ഇപ്പോൾ വാട്‌സ്ആപ്പിലും ലഭ്യമാണ്. ഏറ്റവും പുതിയ വാർത്തകൾക്കായി ക്ലിക്ക് ചെയ്യൂ