'മഴ പെയ്യും, സമനില എടുത്തുകൂടെ?'; ക്യാപ്റ്റൻ ​ഗില്ലിനോട് ബ്രൂക്കിന്റെ ചോദ്യം (വിഡിയോ)

ബർമിങ്ഹാം: ഇന്ത്യ- ഇം​ഗ്ലണ്ട് രണ്ടാം ടെസ്റ്റിന്റെ നാലാം ദിനത്തിൽ ക്യാപ്റ്റൻ ശുഭ്മാൻ ​ഗില്ലും ഇം​ഗ്ലീഷ് താരം ഹാരി ബ്രൂക്കും തമ്മിൽ സംസാരിച്ചതിന്റെ വിഡിയോ വൈറൽ. ഇന്ത്യയുടെ ബാറ്റിങിനിടെ, മത്സരം സമനിലയിൽ അവസാനിക്കുമെന്നു ബ്രൂക്ക് പറയുന്നതും ​ഗിൽ അതിനു നൽകിയ മറുപടിയുമാണ് വിഡിയോയിൽ. സ്റ്റംപ് മൈക്ക് പിടിച്ചെടുത്തതാണ് ഇരുവരുടേയും സംഭാഷണം.

ഒന്നാം ഇന്നിങ്സിൽ ഇരട്ട സെഞ്ച്വറിയും രണ്ടാം ഇന്നിങ്സിൽ സെഞ്ച്വറിയും നേടി ​ഗിൽ ഇം​ഗ്ലീഷ് ബൗളിങെ നിരയെ ചെറുതായൊന്നുമല്ല കുഴക്കിയത്. താരം 162 പന്തിൽ 161 റൺസെടുത്താണ് മടങ്ങിയത്. 8 സിക്സുകളും തൂക്കി. അതിനിടെയാണ് ബ്രൂക്ക് ഇന്ത്യൻ ക്യാപ്റ്റനോടു കളിയുടെ സഹാചര്യം സംസാരിച്ചത്. ഈ ഘട്ടത്തിൽ ഇന്ത്യയുടെ മൊത്തം ലീഡ് 450നടുത്ത് എത്തിയിരുന്നു.

'450ന് ഡിക്ലയർ ചെയ്യുമോ. ശുഭ്മാൻ നാളെ മഴ പെയ്യാൻ സാധ്യതയുണ്ട്. അര ദിവസമാണ് ബാക്കിയുള്ളത്. ഉച്ചയ്ക്ക് ശേഷവും മഴ പെയ്യും'- ബ്രൂക്ക് പറഞ്ഞു. ​'ഞങ്ങളുടെ നിർഭാ​ഗ്യം'- എന്നായിരുന്നു ​ഗില്ലിന്റെ പ്രതികരണം. 'എങ്കിൽ സമനിലയിൽ പിരിഞ്ഞു കൂടെ'- ബ്രൂക്കിന്റെ ചോദ്യം. ഇത്രയുമാണ് വിഡിയോയിലെ സംഭാഷണം.

ഇന്ത്യയുടെ ലീഡ് 600 ക‍ടന്നതിനു പിന്നാലെയാണ് ​ഗിൽ ഡിക്ലയർ ചെയ്തത്. രണ്ടാം ഇന്നിങ്സിൽ ഇന്ത്യ 6 വിക്കറ്റ് നഷ്ടത്തിൽ 427 റൺസെടുത്ത് ഇന്നിങ്സ് ഡിക്ലയർ ചെയ്ത് ഇം​ഗ്ലണ്ടിനു മുന്നിൽ 608 റൺസെന്ന കൂറ്റൻ സ്കോർ വച്ചു. ഇന്നലെ 72 റൺസിനിടെ ഇം​ഗ്ലണ്ടിന്റെ 3 വിക്കറ്റുകൾ വീഴ്ത്തി ഇന്ത്യ കളിയിൽ ആധിപത്യവും സ്ഥാപിച്ചു.