ആന്റിഗ്വാ: വെസ്റ്റ് ഇന്‍ഡീസിന്റെ ടെസ്റ്റ് ടീമിന്റെ നായക സ്ഥാനത്ത് നിന്നും ജാസന്‍ ഹോള്‍ഡറെ നീക്കി. ഓപ്പണിങ് ബാറ്റ്‌സ്മാന്‍ ക്രെയ്ഗ് ബ്രാത്വെയ്റ്റ് ആണ് പുതിയ നായകന്‍. 37 ടെസ്റ്റുകളിലാണ് ബ്രാത്വെയ്റ്റ് വിന്‍ഡിസിനെ നയിച്ചത്. കഴിഞ്ഞ മാസം നടന്ന ബംഗ്ലാദേശിന് എതിരായ പര്യടനത്തില്‍ 2-0ന്റെ ജയത്തിലേക്ക് ബ്രാത്വെയ്റ്റ് ടീമിനെ എത്തിച്ചിരുന്നു.
കോവിഡിന്റെ പേരില്‍ ഹോള്‍ഡര്‍ ഉള്‍പ്പെടെയുള്ള മുന്‍നിര താരങ്ങള്‍ മാറി നിന്നപ്പോഴായിരുന്നു ബ്രാത്വെയ്റ്റ് ബി ടീമുമായി പരമ്പര തൂത്തുവാരിയത്. ഈ സമയം വിന്‍ഡിസ് ടെസ്റ്റ് ടീമിനെ നയിക്കാന്‍ യോഗ്യനായ വ്യക്തി ബ്രാത് വെയ്റ്റ് ആണെന്ന് വിശ്വസിക്കുന്നതായി വിന്‍ഡിസ് ചീഫ് സെലക്ടര്‍ റോജര്‍ ഹാര്‍പ്പര്‍ പറഞ്ഞു.
ബംഗ്ലാദേശിന് എതിരായ പരമ്പരയില്‍ കളിക്കാരെ ഉണര്‍ത്താനും, വിന്‍ഡിസ് ടീമിനെ നമ്മള്‍ കൊണ്ടുവരാന്‍ ആഗ്രഹിക്കുന്ന സംസ്‌കാരത്തിലേക്ക് എത്തിക്കാനുമായതായി വിന്‍ഡിസ് ക്രിക്കറ്റ് ബോര്‍ഡ് ചൂണ്ടിക്കാണിക്കുന്നു. വിന്‍ഡിസ് ടീമിന്റെ നായക സ്ഥാനം ലഭിച്ചത് വലിയ അംഗീകാരമായി കാണുന്നതായി ബ്രാത്വെയ്റ്റ് പറഞ്ഞു.
രണ്ട് ടെസ്റ്റുകളാണ് ഈ മാസം വിന്‍ഡിസ് ശ്രീലങ്കയ്‌ക്കെതിരെ കളിക്കുക. നായക സ്ഥാനത്ത് നിന്നും ഹോള്‍ഡറെ മാറ്റിയെങ്കിലും, ടീമിലെ പ്രധാന താരമായി ഹോള്‍ഡര്‍ തുടരും. കഴിഞ്ഞ അഞ്ചര വര്‍ഷം ഹോള്‍ഡര്‍ കളിയുടെ സംസ്‌കാരം ഉയര്‍ത്തി പിടിച്ച് ടീമിനെ നയിച്ചതായി വിന്‍ഡിസ് ക്രിക്കറ്റ് ബോര്‍ഡിന്റെ പ്രസ്താവനയില്‍ പറയുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
