‘ജോർജ്കുട്ടി സൃഷ്ടിച്ച ആ ട്വിസ്റ്റ് കണ്ട് ഉച്ചത്തിൽ ചിരിച്ചു; ഇതുവരെ കാണാത്തവർ ‘ദൃശ്യം‘ ഒന്ന് മുതൽ കാണുക‘- അഭിനന്ദനവുമായി ആർ അശ്വിനും

ചെന്നൈ: മോഹൻലാൽ നായകനായ മലയാള ചിത്രം ദൃശ്യം രണ്ടാം ഭാഗം വലിയ പ്രേക്ഷക പിന്തുണയുമായി മുന്നേറുകയാണ്. കായിക മേഖലയിൽ പോലും ദൃശ്യം തരം​ഗമായി മാറുകയാണ് ഇപ്പോൾ. രണ്ട് ദിവസം മുൻപ് ഇം​ഗ്ലീഷ് പ്രീമിയർ ലീ​ഗ് ടീം ടോട്ടനം ഹോട്സ്പറിന്റെ ഫെയ്സ്ബുക്ക് പേജിൽ ദൃശ്യത്തിലെ ഡയലോ​ഗ് പ്രത്യക്ഷപ്പെട്ടിരുന്നു. പിന്നാലെയിതാ ചിത്രത്തെ അഭിനന്ദിച്ച് എത്തിയിരിക്കുകയാണ് ഇന്ത്യൻ ക്രിക്കറ്റ് താരം രവിചന്ദ്രൻ അശ്വിൻ. 

ഇംഗ്ലണ്ടിനെതിരായ രണ്ടാം ക്രിക്കറ്റ് ടെസ്റ്റിൽ ഇന്ത്യൻ വിജയ ശിൽപിയായതിന് പിന്നാലെയാണ് അശ്വിൻ സിനിമ കണ്ടത്. ​ഗംഭീര സിനിമയാണെന്നും ഇതുവരെ കാണാത്തവർ ഒന്നും രണ്ടും ഭാ​ഗങ്ങൾ കാണണമെന്നും അശ്വിൻ ട്വിറ്ററിലിട്ട കുറിപ്പിൽ വ്യക്തമാക്കി. 

‘ദൃശ്യം രണ്ടിൽ മോഹൻലാൽ അവതരിപ്പിച്ച ജോർജ്കുട്ടി കോടതിക്കുള്ളിൽ സൃഷ്ടിച്ച ട്വിസ്റ്റ് കണ്ട് ഉച്ചത്തിൽ ചിരിച്ചു പോയി. ഇതുവരെ കാണാത്തവർ ദൃശ്യം ഒന്ന് മുതൽ കാണുക. മികച്ച ചിത്രമാണ്. വളരെ മികച്ച ചിത്രം’ – അശ്വിൻ ട്വിറ്ററിൽ കുറിച്ചു.

കോവിഡ് വ്യാപനത്തിന്റെ പശ്ചാത്തലത്തിൽ ഒടിടി പ്ലാറ്റ്ഫോമിൽ റിലീസ് ചെയ്ത ദൃശ്യം 2 വളരെ മികച്ച പ്രതികരണം നേടി മുന്നേറുകയാണ്. ദൃശ്യത്തിന്റെ ആദ്യ ഭാഗം ഒരുക്കിയ ജീത്തു ജോസഫാണ് രണ്ടാം ഭാഗവും തിരക്കഥയെഴുതി സംവിധാനം ചെയ്തത്.