റാഞ്ചി: ടെസ്റ്റ് പരമ്പരയിലെ ദയനീയ തോല്‍വിക്ക് കണക്കു തീര്‍ക്കാനുള്ള ഇന്ത്യയുടെ യാത്രയ്ക്ക് ഇന്ന് തുടക്കം. ദക്ഷിണാഫ്രിക്കയ്‌ക്കെതിരായ ഏകദിന പരമ്പര ഇന്ന് മുതൽ തുടങ്ങുന്നു. ആദ്യ മത്സരം ഇന്ന് റാഞ്ചിയിൽ. ഉച്ചയ്ക്ക് 1.30 മുതലാണ് പോരാട്ടം. ടെസ്റ്റ് ടീമിനെ അപേക്ഷിച്ച് ഏകദിന ടീമിലെ വ്യത്യാസം മുന്‍ നായകന്‍മാരും ഇതിഹാസങ്ങളുമായ രോഹിത് ശര്‍മ, വിരാട് കോഹ്‌ലി എന്നിവരുടെ സാന്നിധ്യം തന്നെ. ഏകദിനത്തില്‍ മാത്രം കളിക്കുന്ന ഇരുവരും ഒക്ടോബറില്‍ ഓസ്‌ട്രേലിയക്കെതിരെ മൂന്ന് മത്സരം കളിച്ച ശേഷം വീണ്ടും അന്താരാഷ്ട്ര പോരിനിറങ്ങുകയാണ്. ഇരുവരുടേയും സാന്നിധ്യം തന്നെ ടീമിന്റെ ആത്മവിശ്വാസം ഉയര്‍ത്തുമെന്നു ക്യാപ്റ്റന്‍ കെഎല്‍ രാഹുല്‍ വ്യക്തമാക്കുന്നു.
രോ- കോ സഖ്യത്തെ സംബന്ധിച്ചു എല്ലാ മത്സരവും നിര്‍ണായകമാണ്. 2027ലെ ഏകദിന ലോകകപ്പ് ലക്ഷ്യമിടുന്ന ഇരുവര്‍ക്കും മാനേജ്‌മെന്റിന്റെ റഡാറിനുള്ളിലാണ് കളിക്കേണ്ടത്. മാത്രമല്ല ഈ പരമ്പരയ്ക്കു ശേഷം ഇരുവരുടേയും ഭാവി സംബന്ധിച്ചു തീരുമാനമെടുക്കാന്‍ ബിസിസിഐ നിര്‍ണായക യോഗവും വിളിച്ചിട്ടുണ്ട്.
ഓസീസിനെതിരായ പരമ്പരയില്‍ രോഹിത് മിന്നും ഫോമിലായിരുന്നു. ഒരു സെഞ്ച്വറിയടക്കം പരമ്പരയിലെ ടോപ് സ്‌കോററായി. കോഹ്‌ലി ആദ്യ രണ്ട് ഏകദിനങ്ങളിലും ബാറ്റിങില്‍ പരാജയപ്പെട്ടെങ്കിലും മൂന്നാം പോരാട്ടത്തില്‍ അര്‍ധ സെഞ്ച്വറിയടിച്ച് ഫോം വീണ്ടെടുത്തു. ഇരുവരും ഫോമിലാണെന്നത് ഇന്ത്യയ്ക്ക് അധിക കരുത്തു നല്‍കും.
നായകന്‍ ശുഭ്മാന്‍ ഗില്‍ പരിക്കേറ്റ് വിശ്രമത്തിലായതോടെ ഏകദിനത്തില്‍ കെഎല്‍ രാഹുലാണ് ടീം ഇന്ത്യയെ നയിക്കുന്നത്. രാഹുല്‍ വിക്കറ്റ് കീപ്പര്‍ ബാറ്ററായതിനാല്‍ ഋഷഭ് പന്ത് കളിക്കുന്ന കാര്യത്തില്‍ വ്യക്തത വന്നിട്ടില്ല. രോഹിതും യശസ്വി ജയ്‌സ്വാളും ഓപ്പണ്‍ ചെയ്യും. വണ്‍ ഡൗണായി കോഹ്‌ലി എത്തും.
മറ്റൊരു ഓപ്പണര്‍ ഋതുരാജ് ഗെയ്ക്‌വാദും ടീമിലുണ്ട്. താരം ആഭ്യന്തര ക്രിക്കറ്റിലടക്കം മികവ് ആവര്‍ത്തിച്ചിട്ടും മതിയായ അവസരം കൊടുത്തിട്ടില്ലെന്ന ആലോചന ടീം മാനേജ്‌മെന്റിനുണ്ട്. നാലാം നമ്പറില്‍ ഒരുപക്ഷേ ഋതുരാജിനു അവസരം ലഭിച്ചേക്കും. തിലക് വര്‍മ, ഋഷഭ് പന്ത് എന്നിവരും ഈ സ്ഥാനങ്ങളിലേക്ക് പരിഗണനയിലുള്ളവര്‍ തന്നെ.
സ്പിന്നിനു അനുകൂലമാണ് റാഞ്ചിയിലെ പിച്ച്. സ്പിന്‍ ഓള്‍ റൗണ്ടര്‍മാരായ വാഷിങ്ടന്‍ സുന്ദര്‍, രവീന്ദ്ര ജഡേജ എന്നിവര്‍ക്ക് അതിനാല്‍ മുന്‍ഗണനയുണ്ടാകും. സ്‌പെഷലിസ്റ്റ് സ്പിന്നര്‍ കുല്‍ദീപ് യാദവിനെ കളിപ്പിക്കുമോ എന്നതില്‍ വ്യക്തതയില്ല.
ജസ്പ്രിത് ബുംറ, മുഹമ്മദ് സിറാജ് എന്നിവര്‍ക്ക് വിശ്രമം അനുവദിച്ചതിനാല്‍ അര്‍ഷ്ദീപ് സിങ്, പ്രസിദ്ധ് കൃഷ്ണ എന്നിവരാണ് പേസിന് നേതൃത്വം നല്‍കുന്നത്. ഹര്‍ഷിത് റാണ, നിതീഷ് കുമാര്‍ റെഡ്ഡി എന്നിവരും ടീമിലുണ്ട്.
ടെസ്റ്റിലെ സമ്പൂര്‍ണ ആധിപത്യത്തിന്റെ ആത്മവിശ്വസത്തിലാണ് ദക്ഷിണാഫ്രിക്ക ഇറങ്ങുന്നത്. ഏകദിനത്തില്‍ ഇന്ത്യ ഒന്നാം റാങ്കിലാണെങ്കില്‍ പ്രോട്ടീസ് ആറാമതാണ്. എന്നാല്‍ നിലവില്‍ ടെസ്റ്റ് കളിച്ച ഫോമിലുള്ള പല താരങ്ങളും ഏകദിനത്തിലും ഇറങ്ങുന്നുണ്ട്.
കഗിസോ റബാഡ ഇല്ലെങ്കിലും പേസ് പടയ്ക്ക് കരുത്തായി ലുന്‍ഗി എന്‍ഗിഡി, നാന്ദ്രെ ബര്‍ഗര്‍ എന്നിവര്‍ ഏകദിനത്തിലുണ്ട്. ഒപ്പം മിന്നും ഫോമില്‍ പന്തെറിഞ്ഞ് ഇന്ത്യയെ രണ്ടാം ടെസ്റ്റില്‍ തകര്‍ത്ത മാര്‍ക്കോ യാന്‍സനും. സ്പിന്നറായി കേശവ് മഹാരാജും ടീമിലുണ്ട്. താരവും ഇന്ത്യയെ കുഴക്കിയ ബൗളറാണ്. ടെംബ ബവുമയാണ് ടീം നായകന്‍.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
