ഇന്ത്യൻ വനിതാ ക്രിക്കറ്റ് ടീം ദക്ഷിണാഫ്രിക്കയിലേക്ക്; അഞ്ച് ടി20 മത്സരങ്ങൾ കളിക്കും

മുംബൈ: വനിതാ ടി20 ലോകകപ്പിന് മുൻപ് ഇന്ത്യൻ ടീമും ദക്ഷിണാഫ്രിക്കൻ ടീമും ഏറ്റുമുട്ടുന്നു. ഏപ്രിൽ മാസം ദക്ഷിണാഫ്രിക്കയിൽ വെച്ചാണ് അഞ്ച് മത്സരങ്ങൾ അടങ്ങുന്ന ടി20 പരമ്പര. ഇരു ടീമുകൾക്കും ലോകകപ്പ് മത്സരങ്ങൾക്ക് മുൻപ് ആത്മവിശ്വാസം ഉറപ്പാക്കാനുള്ള അവസരം കൂടിയാണിത്.

ഏപ്രിൽ 17, 19 തീയതികളിൽ ഡർബനിലാണ് ആദ്യ രണ്ട് മത്സരങ്ങൾ നടക്കുന്നത്. ഏപ്രിൽ 22, 25 തീയതികളിൽ ജോഹന്നാസ്ബർഗിൽ രണ്ട് മത്സരങ്ങളും പരമ്പരയിലെ അവസാന മത്സരം ഏപ്രിൽ 27ന് ബെനോണിയിലുമാണ് നടക്കുന്നത്.

“ലോകകപ്പിന് തൊട്ടുമുമ്പ് ഇന്ത്യയെ പോലുള്ള ശക്തമായ ടീമിനെ നേരിടുന്നത് ടീമിന് വലിയ പ്രയോജനം ചെയ്യും. സ്വന്തം കഴിവുകൾ പരീക്ഷിക്കാനും ടീമിന്റെ കോമ്പിനേഷനുകൾ മെച്ചപ്പെടുത്താനും സമ്മർദ്ദ സാഹചര്യങ്ങളിൽ പ്രത്യേക പദ്ധതികൾ നടപ്പാക്കാനും ഈ പരമ്പര സഹായിക്കും'' ദക്ഷിണാഫ്രിക്കൻ ക്രിക്കറ്റ് ടീം ഡയറക്ടർ ഇനോക് എൻക്വെ പറഞ്ഞു.

വനിതാ ടി20 ലോകകപ്പ് ജൂൺ 12ന് ഇംഗ്ലണ്ടിൽ ആരംഭിക്കും. ഗ്രൂപ്പ് ഒന്നിൽ ദക്ഷിണാഫ്രിക്ക, ഓസ്‌ട്രേലിയ, പാകിസ്ഥാൻ, രണ്ട് ക്വാളിഫയർ ടീമുകൾ എന്നിവരോടൊപ്പം ആകും ഇന്ത്യൻ ടീം മത്സരിക്കുക.