യുവരാജ് സിങ് അച്ഛനായി; ആൺകുഞ്ഞ് പിറന്ന സന്തോഷം പങ്കുവച്ച് താരം 

മുൻ ഇന്ത്യൻ ക്രിക്കറ്റ് താരം യുവരാജ് സിങ് - ഹേസൽ കീച്ച് ദമ്പതികൾക്ക് ആൺകുഞ്ഞ് പിറന്നു. യുവരാജ് തന്നെയാണ് സന്തോഷവാർത്ത പങ്കുവച്ചത്. 

"ഞങ്ങളുടെ എല്ലാ ആരാധകരോടും കുടുംബാം​ഗങ്ങളോടും സുഹൃത്തുക്കളോടും, ഇന്ന് ദൈവം ഞങ്ങൾക്കൊരു ആൺകുഞ്ഞിനെ നൽകി അനുഗ്രഹിച്ചതിന്റെ സന്തോഷം പങ്കുവെക്കുന്നു. ഈ അനുഗ്രഹത്തിന് ദൈവത്തോട് നന്ദി പറയുന്നു. ഞങ്ങളുടെ കുഞ്ഞിനെ ഈ ലോകത്തേക്ക് സ്വാഗതം ചെയ്യുമ്പോൾ ഞങ്ങളുടെ സ്വകാര്യതയെ മാനിക്കണമെന്ന് ആഗ്രഹിക്കുന്നു. സ്‌നേഹത്തോടെ ഹസലും യുവരാജും.", എന്നാണ് യുവരാജ് സോഷ്യൽ മീഡിയ പേജുകളിൽ കുറിച്ചത്. യുവരാജിന്റെ പോസ്റ്റിന് താഴെ നിരവധി ആരാധകരാണ് ആശംസകൾ നേർന്നിരിക്കുന്നത്. 

2016 നവംബർ 30നാണ് ഇരുവരും വിവാഹിതരായത്. 2019ലാണ് 40കാരനായ യുവരാജ് എല്ലാ ക്രിക്കറ്റ് ഫോർമാറ്റുകളിൽ നിന്നും വിരമിക്കൽ പ്രഖ്യാപിച്ചത്.