'സുനോ ഗോർ സെ ദുനിയാ വാലോ', സന്തോഷം അടക്കാനാവാതെ ചാടിത്തുള്ളി ഇന്ത്യയുടെ ഹോക്കിപ്പട; വിഡിയോ വൈറൽ

16 വർഷത്തെ കാത്തിരിപ്പ് അവസാനിപ്പിച്ചാണ് ഇന്നലെ നടന്ന മത്സരത്തിൽ ന്യൂസിലൻഡിനെ പെനാൽറ്റി ഷൂട്ടൗട്ടിൽ തോൽപ്പിച്ച് കോമൺവെൽത്ത് ഗെയിംസ് ഹോക്കിയിൽ ഇന്ത്യൻ വനിതകൾ വെങ്കലം സ്വന്തമാക്കിയത്. ചരിത്രവിജയം ഇന്ത്യൻ താരങ്ങൾ ആവേശത്തോടെ ആഘോഷിക്കുകയും ചെയ്തു. ഡ്രെസ്സിംഗ് റൂമിൽ "സുനോ ഗോർ സെ ദുനിയാ വാലോ" എന്ന പാട്ടിനൊപ്പം താരങ്ങൾ നൃത്തം ചെയ്യുന്ന വിഡിയോ കാണാം. 

സന്തോഷം അടക്കാനാവാതെ പാട്ടിനൊപ്പം തുള്ളിച്ചാടുന്ന താരങ്ങളെയാണ് വിഡിയോയിൽ കാണാൻ കഴിയുന്നത്. അഭിമാന നേട്ടത്തിന് ടീമിനെ അഭിനന്ദിച്ചുകൊണ്ടാണ് ഈ വിഡിയോ വൈറലാകുന്നത്.

നിശ്ചിത സമയം ഇന്ത്യയും ന്യൂസിലാൻഡും 1-1ന് സമനിലയിലെത്തി. ഇതോടെ പെനാൽറ്റി ഷൂട്ടൗട്ടിലേക്ക് നീണ്ട കളിയിൽ 2-1നാണ് ഇന്ത്യയുടെ ജയം. 2006ന് ശേഷം ആദ്യമായാണ് കോമൺവെൽത്ത് ഗെയിംസ് ഹോക്കിയിൽ ഇന്ത്യ മെഡൽ നേടുന്നത്. പെനാൽറ്റി ഷൂട്ടൗട്ടിൽ ഇന്ത്യയുടെ സംഗിതയുടെ സ്‌ട്രോക്ക് ന്യൂസിലൻഡ് ഗോൾകീപ്പർ തടഞ്ഞു. എന്നാൽ ആദ്യ സ്‌ട്രോക്ക് നേടിയതിന്റെ ആത്മവിശ്വാസത്തിൽ എത്തിയ ന്യൂസിലൻഡിന്റെ രണ്ടാമത്തെ സ്‌ട്രോക്ക് സവിത തടഞ്ഞു. സോണികയാണ് ഇന്ത്യക്കായി രണ്ടാമത്തെ സ്‌ട്രോക്ക് എടുത്തത്. അത് വലയിലെത്തിക്കാനായതോടെ ഷൂട്ടൗട്ടിൽ 1-1ന് ഓപ്പമെത്തി. 

കിവീസിന്റെ റോസ് ടൈനാൻസിന്റെ ഷോട്ട് വൈഡായി പോയപ്പോൾ ഇന്ത്യയുടെ മൂന്നാമത്തെ സ്‌ട്രോക്ക് എടുത്ത നവ്‌നീതിന് പിഴച്ചില്ല. ന്യൂസിലൻഡിന്റെ നാലാം സ്‌ട്രോക്കും സവിത തടഞ്ഞു. എന്നാൽ ഇന്ത്യയുടെ നാലാം സ്‌ട്രോക്കിൽ നേഹക്ക് പിഴച്ചതോടെ ന്യൂസിലൻഡിന് വീണ്ടും ജീവൻ കിട്ടി. എന്നാൽ ഒലിവിയയുടെ ഷോട്ടും സവിത സേവ് ചെയ്തതോടെ ഇന്ത്യ മെഡൽ തൊട്ടു. 

ഈ വാർത്ത കൂടി വായിക്കൂ

'ചവറ് ബാറ്റിംഗ്', സാമാന്യബുദ്ധി ഇല്ല; ഫൈനലിൽ തോറ്റ ഇന്ത്യൻ വനിതാ ടീമിനെ വിമർശിച്ച് അസ്ഹറുദ്ദീൻ 

സമകാലിക മലയാളം ഇപ്പോൾ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാർത്തകൾക്കായി ക്ലിക്ക് ചെയ്യൂ