ബംബോലിം: ഐഎസ്‌എല്ലിലെ ഈ സീസണിലെ കന്നി ജയം സ്വന്തമാക്കി കേരള ബ്ലാസ്റ്റേഴ്‌സ്. കരുത്തരായ ഹൈദരാബാദ് എഫ് സിയെയാണ് ബ്ലാസ്റ്റേഴ്‌സ് കീഴടക്കിയത്. എതിരില്ലാത്ത രണ്ടു ഗോളുകൾക്കാണ് വിജയം. മലയാളി താരം അബ്ദുൾ ഹക്കുവും ജോർദാൻ മുറെയും ബ്ലാസ്റ്റേഴ്സിനായി ഗോൾ നേടി. ജിക്‌സൺ സിങ് ഹീറോ ഓഫ് ദ മാച്ച് പുരസ്‌കാരം സ്വന്തമാക്കി.
ആദ്യപകുതിയിൽ കളി 28-ാം മിനിറ്റിൽ എത്തിയപ്പോഴാണ് അബ്ദുൾ ഹക്കു ഗോൾവല കുലുക്കിയത്. ബോക്‌സിലേക്ക് ഉയർന്നുവന്ന കോർണർ കിക്ക് ഉജ്ജ്വലമായ ഒരു ഹെഡ്ഡറിലൂടെ വലയിലെത്തി. ഈ സീസണിൽ ആദ്യമായി ആദ്യ ഇലവനിൽ സ്ഥാനം നേടിയ ഹക്കുവിന്റെ സീസണിലെ ആദ്യ ഗോളുമാണിത്.
ആദ്യ പകുതിയിൽ ഉണർന്നു കളിച്ച ഹൈദരാബാദ് ബ്ലാസ്റ്റേഴ്‌സ് ബോക്‌സിനുള്ളിൽ നിരന്തരം ഇരച്ചുകയറിയെങ്കിലും സ്കോർ പിറന്നില്ല. രണ്ടാം പകുതിയിൽ കിട്ടിയ അവസരങ്ങൾ കൈവിട്ടതും നിർഭാഗ്യവും ഹൈദരാബാദിന് വിലങ്ങായി. 87-ാം മിനിട്ടിലാണ് ബ്ലാസ്റ്റേഴ്സിന്റെ രണ്ടാം ഗോൾ. ജോർദാൻ മുറെ സീസണിൽ നേടിയ രണ്ടാമത്തെ ഗോളാണ് ഇത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
